Al-Arabija: Kadafi źbieh u Vieniesuełu. Syn Kadafi: Baćka ŭ krainie i budzie zmahacca da apošniaha patrona

Uranku ŭ paniadziełak na dziaržaŭnym telebačańni sa zvarotam vystupiŭ syn livijskaha dyktatara Siejf-ul-Isłam.

Jon zajaviŭ, što jahony baćka zastajecca ŭ krainie i paabiacaŭ reformy. Jon paabiacaŭ taksama stvareńnie svabodnych ŚMI i admienu represiŭnych zakonaŭ.

Jon pryznaŭ pamyłki dziejnaj ułady. «Vy kažacie: „My chočam demakratyi i pravoŭ“. My možam razam abmiarkoŭvać hetyja pytańni. My daŭno ŭžo pavinny byli ich abmiarkoŭvać. Tak što zaraz ci nikoli», — abiacaŭ Siejf ul-Isłam.

Jon dadaŭ, što Kadafi «i sam choča», kab u krainie pajaviłasia kanstytucyja. Jon abiacaŭ, što ŭžo ŭ paniadziełak dniom Usieahulny narodny kanhres skliča pasiadžeńnie dla abmierkavańnia majučych adbycca libieralnych reformaŭ.

«U nas dva varyjanty dziejańniaŭ: my možam pačać reformy nieadkładna — i heta budzie histaryčny momant. Abo vajna", — zajaviŭ Siejf ul-Isłam. «Nastupstvy buduć horšyja, čym tyja, što byli ŭ Juhasłavii, kali my nie abiarem pieršy varyjant».

«Zaŭtra my pabudujem novuju, mocnuju Liviju», — abiacaŭ jon.

Jahony telezvarot adbyŭsia paśla taho, jak kryvavyja pratesty suprać Kadafi, što kiruje Livijaj 42 hady, pierakinulisia na stalicu krainy, horad Trypali.

Učora paŭstancy ŭ Trypali zaniali centralnuju płošču stalicy i budynak Viarchoŭnaha suda. Ich atakavała asabistaja hvardyja Kadafi.

Siejf-ul-Isłam Kadafi ŭ svaim zvarocie znoŭ i znoŭ pahražaŭ, što ŭ vypadku praciahu pratestaŭ kraina moža pahruzicca ŭ kryvavuju hramadzianskuju vajnu. Jon źviazvaŭ apazicyju z vajnoj. «Kraina raskolecca, jak Paŭnočnaja i Paŭdniovaja Kareja», — skazaŭ jon. Syn Kadafi śćviardžaŭ, što armija padtrymlivaje jahonaha baćku. «My budziem zmahacca da apošniaj chviliny, da apošniaha patrona», — zajaviŭ jon u tych samych vyrazach, jakija kaliści ŭžyvaŭ i Alaksandr Łukašenka, adkazvajučy na pahrozy svajmu kiravańniu.

Siejf-ul-Isłam skazaŭ, što jahony baćka ŭznačalvaje apieracyi suprać paŭstancaŭ, ale pryznaŭ, što miaciežniki zachapili niekatoryja vajskovyja bazy, tanki i ŭzbrajeńni. «Ciapier ałkaholiki jeździać na tankach pa Bienhazi», – pałochaŭ Siejf ul-Isłam.

«My nie Tunis i nie Jehipiet», — zaklinaŭ Kadafi-małodšy. «U nas niama partyj, u nas kłany i plamiony, — kazaŭ jon. — Nas abjadnoŭvaje nafta. Kali padziei praciahnucca, zamiežnyja inviestary nie buduć prychodzić u Liviju». «U nas budzie novy ściah i himn. Ale ŭ nas nie budzie nafty, i chleba taksama nie budzie. Ciapier my smutkujem pa 200 zahinułych, a budziem smutkavać pa sta tysiačach».

U pryznaŭ «pamyłki» armii ŭ baraćbie z «biesparadkami», ale zajaviŭ, što kolkaść achviaraŭ pierabolšana. Pavodle jahonych słovaŭ, u stalicy, Trypali zahinuli 14, a ŭ Bienhazi — 84 asoby.

Pravaabaroncy nazyvali ličbu 174 achviary pa stanie na niadzielu, biez uliku kryvavych padziej u samim Trypali. Miž tym daktary z balnic Bienhazi havaryli pra sotni achviaraŭ.

Syn Kadafi abvinavaciŭ u padziejach zamiežnyja siły. Jon nazvaŭ paŭstancaŭ «bandytami» i «narkamanami».

Jak ličyć Siejf ul-Isłam, za arhanizacyjaj biesparadkaŭ u Livii stajać «try siły»: palityčnyja aktyvisty, ź jakimi Kadafi hatovy abmiarkoŭvać budučyja reformy, «isłamisckija elemienty» i naftavyja mahnaty.

«Isłamisckija elemienty», pa słovach syna livijskaha lidera, heta vychadcy z susiednich arabskich dziaržaŭ, jakija prybyli dla arhanizacyi biesparadkaŭ pa tym ža scenary, što i ŭ Jehipcie.

«Tuniskija i jehipieckija najmity taksama tut, i pry tym jany ŭzbrojenyja. Jany pryjšli, kab padzialić i zachapić našu krainu», — zajaviŭ Siejf ul-Isłam. Jon nahadaŭ, što napiaredadni śpiecsłužby raskryli «špijonskuju sietku», jakaja składajecca z hramadzian inšych arabskich dziaržaŭ.

Havoračy ab zacikaŭlenaści naftavych mahnataŭ ŭ livijskaj revalucyi, Siejf al-Isłam nahadaŭ, što nafta — asnoŭnaja krynica dachodaŭ dziaržaŭnaha biudžetu dla Livii, i ŭ vypadku hramadzianskaj vajny nie budzie kamu kiravać halinoj i raźmiarkoŭvać dachody ad prodažu. «Pačniecca bitva za naftu».

U zvarocie da nacyi Siejf ul-Isłam dakazvaŭ, što Livija — «nie Tunis i nie Jehipiet», što dla jaho krainy «nieprymalny i niemahčymy scenar revalucyj», jakija adbylisia ŭ hetych afrykanskich krainach.

«Kadafi — nie Mubarak i nie Ben Ali, kłasičnyja tyrany. Jon — narodny lidar. I ciapier dziasiatki tysiač čałaviek nakiroŭvajucca siudy, kab padtrymać jaho», — zapeŭnivaŭ Siejf ul-Isłam.

U zaviaršeńni telezvarotu Siejf al-Isłam nahadaŭ pra «chaos» 1951–1969 hadoŭ, kali Livija spačatku stała niezaležnym karaleŭstvam, a zatym respublikaj i chvaliŭ paradak u krainie.

Ekscentryčny i isteryčny Kadafi ŭstalavaŭ u Livii režym asabistaj ułady svajoj siamji, prykryty farmalnym narodaŭładździem, abo Džamachiryjaj.

U niadzielu niekalki tysiač čałaviek u Trypali vyjšli na vulicy. Jany palili partrety Kadafi i hramili pamiaškańni palicyi i t.chv. «narodnych kamitetaŭ» — h.zn. anałaha biełaruskaj viertykali ŭłady.

Paźniej u niadzielu pasoł Livii ŭ Kitai zaklikaŭ armiju ŭmiašacca i ŭziać uładu ŭ svaje ruki. Jon zajaviŭ, što ŭ stalicy pačalisia bai pamiž synami Kadafi. Taksama ŭ niadzielu pryjšli paviedamleńni, što dva najbujniejšyja bierbierskija plamiony padtrymali paŭstańnie i ŭziali pad svoj kantrol poŭdzień krainy.

* * *

Pałkoŭnik Muamar Kadafi pakinuŭ Liviju i nakiravaŭsia ŭ adnu z krain Łacinskaj Amieryki.

Pra heta paviedamlaje telekanał «Al-Arabija» sa spasyłkaj na siabra Mižnarodnaha kryminalnaha suda, vyhnanaha z krainy livijskaha apazicyjaniera Chajdzi Šałaufa.

Mierkavana, Kadafi nakiravaŭsia ŭ Vieniesuełu abo Braziliju.

Jak adznačaje telekanał, uskosnym dokazam adjezdu Kadafi moža słužyć toje,

što sa stalicy Trypali da ciapierašniaha momantu syšli ŭsie padraździaleńni dziaržaŭnaj słužby biaśpieki.

Kadafi kiruje Livijaj ad 1969 h., bolš za 40 hadoŭ.

* * *

00:20

U stalicy Livii Trypali prachodziać sutyknieńnia pratestoŭcaŭ i prychilnikaŭ livijskaha lidera Muamara Kadafi, paviedamlaje telekanał «Al-Džazira».

Taksama paviedamlajecca, pavodle infarmacyi arabskich spadarožnikavych telekanałaŭ, padraździaleńni sił śpiecyjalnaha pryznačeńnia livijskaj armii ŭ horadzie Bienhazi na ŭschodzie krainy pierajšli na bok praciŭnikaŭ režymu livijskaha lidera Muamara Kadafi.

Pavodle infarmacyi telekanała «Al-Džazira», vajskoŭcy paviedamili žycharam, što horad volny ad sił biaśpieki, addanych Kadafi.

Taksama telekanał paviedamlaje,

što pradstaŭnik Livii ŭ Lizie arabskich dziaržaŭ padaŭ u adstaŭku i dałučyŭsia da pratestoŭcaŭ.

Pavodle dadzienych telekanała, čynoŭnik syšoŭ u adstaŭku ŭ znak pratestu suprać razhonu demanstrantaŭ, jaki jon nazvaŭ bojniaj.

Raniej ahienctva Reuters paviedamiła,

što ŭzvod livijskaj armii dałučyŭsia da prysutnych i navat ustupiŭ u boj z asabistaj achovaj Kadafi.

• 0
• 0
• 0
• 0
• 0
• 0
• 0
• 0