Zakrucilisia karasi. Łukašenkaŭskija prapahandysty abskardžvajuć vizavuju zabaronu ŭ Jeŭrapiejskim sudzie
Vadzim Hihin i Alaksiej Michalčanka padajuć pazoŭ u Jeŭrapiejski sud pa pravach čałavieka ŭ Strasburhu.
Łukašenkaŭskija prapahandysty Vadzim Hihin i Alaksiej Michalčanka padajuć pazoŭ u Jeŭrapiejski sud pa pravach čałavieka (JESPČ) u Strasburhu z nahody ŭklučeńnia ich u śpisy asobaŭ, jakim zabaronieny ŭjezd u krainy ES. Pra heta paviedamiła BT.
Jany ŭ liku tych 150 asobaŭ, jakim Jeŭrasajuz zabaraniŭ ujezd na svaju terytoryju ŭ znak pratestu suprać ich dziejańniaŭ.
— Ja i maje kalehi źviarnulisia ŭ mižnarodny sud (JESPČ), tak jak nijakaj viny za saboj nie adčuvajem, — skazaŭ redaktar rupara prezidenckaj ideałahičnaj viertykli «Biełaruskaja dumka» Hihin.
Varta adnačyć, što Biełaruś zastajecca adzinaj krainaj Jeŭropy, hramadzianie jakoj nie mohuć abaraniać svaje pravy ŭ Jeŭrapiejskim sudzie pa pravach čałavieka suprać uładaŭ svajoj krainy. Reč u tym, što Biełaruś jak dyktatura zastajecca adzinaj krainaj Jeŭropy, što nie ŭvachodzić u Radu Jeŭropy. Navat hramadzianie Azierbajdžana i Rasii mohuć abaraniać svaje pravy, a biełarusy — nie. Łukašenka parvaŭ suviazi z Radaj Jeŭropy, bo hety kansultatyŭny orhan nie raz krytykavaŭ parušeńni pravoŭ čałavieka ŭ Biełarusi, u tym liku źniknieńni ludziej i zabojstvy.
Hihin i Michalčanka asabliva vyznačajucca svaim uschvaleńniem Łukašenki i zaklikami da raspravaŭ nad jahonymi praciŭnikami.
Paradoks situacyi ŭ tym, što hramadzianin Biełarusi nie maje prava padać u Jeŭrapiejski sud na łukašenkaŭcaŭ, bo jany nie pryznajuć jurysdykcyi JESPČ, ale hramadzianin Biełarusi moža padać u JESPČ na rašeńni jeŭrapiejskich struktur ci ŭradaŭ, kali jon miarkuje, što tyja parušyli jaonyja pravy.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie1
Kamientary