Čamu nie ŭdajecca pradać biełaruskija pradpryjemstvy?
Mahčyma, sihnał ab padrychtoŭcy «Biełaruśkalija» i «Biełaza» da IPO aznačaje, što dziaržava pierastała spadziavacca atrymać za ich hrošy, jakija možna było b vykarystać dla pieraadoleńnia siońniašniaha kryzisa.
Jak viadoma, Biełaruski ŭrad raptoŭna pačaŭ padrychtoŭku «Biełaruśkalija» da raźmiaščeńnia jaho akcyj na biržy paśla taho, jak rasijski miljarder Kierymaŭ i kalijny kancern «Urałkalij» admovilisia kuplać hety ci nie najbolš pryvabny biełaruski aktyŭ. Akramia hetaha, na biržu płanujecca vyvieści i «Biełaz».
Pastaŭcie siabie na miesca rasijskaha inviestara:ujavim, što vy navat pa nizkaj canie kuplajecie pradpryjemstva. Ale
ź ciaham času, pahatoŭ pa miery vypraŭleńnia ekanamičnaha stanovišča i ŭzroŭnia samaŭpeŭnienaści biełaruskich uładaŭ, vy apynoŭvajeciesia ŭ niebiaśpiecy: biełaruskaja dziaržava ŭ lepšym vypadku pačnie pa tradycyi biescyrymonna ŭmiešvacca ŭ kiravańnie pradpryjemstvam, a ŭ horšym — i takaja ryzyka budzie inviestarami ŭličvacca zaŭždy — nacyjanalizuje jaho nazad.
Vy b kupili takoje pradpryjemstva? Voś i navat rasijskija inviestary nie kupili. Pra intares kitajskich kampanij, jakija raniej ličylisia hałoŭnymi pretendentami na «Biełaruśkalij», ciapier kančatkova maŭčać.
Jak pisałasia raniej, publičnaje raźmiaščeńnie — naturalny šlach častkovaha pryvatyzavańnia bujnych dziaržaŭnych karparacyj, jakim pajšli, skažam, rasijskija i kazachskija dziaržaŭnyja naftahazavyja kampanii. Toje, što biełaruskija ŭłady da hetaha dadumalisia — sama pa sabie dobraja navina, chacia takich dobrych navinaŭ pra dobryja namiery my za apošnija hady nasłuchalisia dastatkova. U tym liku pra mahčymaść publičnaha raźmiaščeńnia niejkich kampanij chołdynha «Biełnaftachim» paviedamlałasia ažno ŭ 2007 hodzie.
Ale vyvad akcyj kampanii na prystojnuju biržu — doŭhi praces, jakomu papiaredničaje doŭhaja padrychtoŭka, jakaja ŭklučaje ad aŭdyta finansavaj spravazdačnaści pa mižnarožnych standartach za niekalki hadoŭ da pieranaładki kiraŭničych pracesaŭ. Tamu IPO dziaržaŭnych kampanij choć i pryniasie ŭ doŭhaterminovaj pierśpiektyvie biezumoŭnyja vyhady i samim pradpryjemstvam, i krainie — ale dać dziaržavie hrošy «tut i zaraz» jany nie zmohuć.
Mahčyma, sihnał ab padrychtoŭcy «Biełaruśkalija» i «Biełaza» da IPO aznačaje, što dziaržava pierastała spadziavacca atrymać za ich hrošy, jakija možna było b vykarystać dla pieraadoleńnia siońniašniaha kryzisa.
Biełaruskaja dziaržava zastajecca ŭ patavaj ekanamičnaj situacyi. Ekanamičnaje stanovišča paharšajecca, ale atrymać hrošy navat ad pryvatyzacyi samych lepšych aktyvaŭ — zadača kudy bolš składanaja, čym mahło zdavacca spačatku.
Inviestary čakajuć radykalnych jaskravych pazityŭnych sihnałaŭ. Takimi sihnałami mahli b być tolki dekłaravanyja namiery pravieści rašučaje refarmavańnie ekanomiki i palityčnaj sistemy krainy. Takich sihnałaŭ niama — a značyć i hrošaj inviestaraŭ nie budzie.
Kamientary