Prezydent aźviareŭ ad spartancaŭ

300 spartancaŭ (300)

ZŠA, 2006, kalarovy, 117 chv.

Režyser: Zak Snajder

Roli vykonvajuć: Džerard Batler, Lena Hedzi, Daminik Ŭest, Vinsent Rehan, Michael Fasbender, Endru Plivin

Žanr: Epičny komiks pavodle tvoru Frenka Milera "Frank Miller's 300"

Adznaka: 7 (z 10)

Prezydent vykazaŭ rezkaje razdražnieńnie amerykanskaj stužkaj “300 spartancaŭ”.

Iranskaha kiraŭnika Achmadziniežada zrazumieć možna.

Kali persy ŭ filmie pakazanyja piakielnymi pačvarami, a z ekranu hučać zakliki da svabody j demakratyi, byccam zapisanyja ŭ Hieneralnym štabie Złučanych Štataŭ nakonadni ŭvarvańnia ŭ Irak, to varta zaturbavacca.

Ale havorka ŭ stužcy “300 spartancaŭ” idzie pra vielmi staruju vajnu.

U 480 hodzie da našaj ery Persydzkaja imperyja napała na Hrecyju. 300 spartancaŭ u Termapilskaj ciaśninie strymlivali ahramadnuju armiju cara Kserksa. Supraciŭ praciahvaŭsia, pakul zdradnik Efialt nie pravioŭ persaŭ u tył abarony. Usie spartancy na čale z carom Leanidam zahinuli, ale hieraičny spartanski čyn staŭsia pačatkam vyzvaleńnia Hrecyi ad zachopnikaŭ.

Karcinu pra byłyja padziei vielmi ciopła pryniali sučasnyja naščadki spartancaŭ. Jak skazała pradstaŭnica hubernii Łakonija Beci Kaliaku, “film adrynuŭ usie čutki i pakazaŭ Spartu va ŭsioj jejnaj vieličy”.

U Eŭropie j Złučanych štatach karcina pabivaje rekordy. Kvitki raskuplenyja, zali poŭniacca navat ranicaj; tolki ŭ adnym atenskim multypleksie na “300 spartancaŭ” zarezervavana 10 tysiač miescaŭ, a ŭ mienskich kinateatrach niemahčyma patrapić na seans.

Daradca iranskaha prezydenta pa spravach kultury nazvaŭ stužku “častkaj amerykanskaj psychalahičnaj vajny suprać iranskaj kultury.”

“Paśla Isłamskaj revalucyi ŭ Iranie Halivud i ŭłady ZŠA pačali vyvučać prablemu ataki na iranskuju kulturu… Biezumoŭna, hety film źjaŭlajecca praduktam dadzienych daśledavańniaŭ,” – zajaviŭ iranski daradca.

Da pratestaŭ dałučylisia j historyki. Tak dacent Tarontskaha ŭniversytetu Efraim Litł padkreślivaje, što spartancy žyli ŭ dziaržavie sacyjalna-rasavaha aparteidu j hartavalisia, palujučy na raboŭ. Jon ličyć nieprymalnym, što spartancy pakazanyja ŭ filmie zanadta maralnymi – dyj, uvohule, nieviadoma, kolki vajaroŭ było ŭ Termapilskaj ciaśninie.

Ale historyk nie ŭzhadvaje, što ŭ stužcy šče dziejničajuć troli, ahramadnyja nasarohi, mahi, uzbronienyja bombami, i katy z klušniami zamiest ruk.

Film – ekranizacyja komiksu Frenka Milera, baćki “Rabakopu” j “Horadu hrachoŭ”. Adpaviedna komiksu – padkreślenaja ŭmoŭnaść koleraŭ i hierojaŭ: šeraje nieba, čyrvonyja nakidki, sčarnieły voŭk, kropli kryvi ŭ rapidzie – i cialesnyja detali skury. Chrumst čyrvonaha jabłyka pierahukajecca sa stohnami zachopnikaŭ, adsiečanaja hałava ŭźlataje u pavietra, na persydzkim bizunie možna razhladzieć kožny vuzielčyk. (Režyser Zak Snajder nie darma vučyŭsia na remejku “Dośvitki mierćviakoŭ”).

Spartancy-vajary ŭ filmie – manumentalna-stanoŭčyja, persy-vorahi – zvyrodlivyja, strakatyja, raśpieščanyja niezvyčajnymi seksualnymi asałodami.

Car Leanid abaraniaje svabodu (i svaju hieteraseksualnaść), car Kserks – razbudoŭvaje imperyju i paturaje žadańniam (abodva punkty vyklikali ŭ Iranie šok: u iranskaj histaryčnaj mitalohii Kserks - jak dla biełarusaŭ Usiasłaŭ Čaradziej).

Ekranny Kserks havoryć, što źniščyć pamiać pra spartancaŭ, zalje kryvioju ichniuju radzimu j vykaranić navat dumki pra supraciŭ.

Ale padčas hreka-persydzkich vojnaŭ azijackaja armija była raźbitaja i Eŭrapa zastałasia Eŭropaj. Karcina “300 spartancaŭ” prapanuje novy epas – na padstavie komiksu. Hety epas umoŭny, naturalistyčny, prymityŭna-plakatny, uzbrojeny kamputarnymi technalohijami j zrazumieły samaj šyrokaj aŭdytoryi.

Pazałočany j utykany pirsynham Kserks paciarpieŭ parazu.

Prynamsi, kino vyihrała.

Fota z sajtu.

Seansy ŭ kinateatrach ”Aŭrora”, “Bieraście”, “Maskva”, “Kastryčnik”

Usie filmy

• 0
• 0
• 0
• 0
• 0
• 0
• 0
• 0