Krysten Ściuart uznačaliła rejtynh Forbes pa zarobkach aktorak

Bolš za ŭsich zarabiła zorka «Źmiarkańnia» Krysten Ściuart, a letašnija lidary Andželina Džali i Sara Džesika Parkier nie zdoleli zachavać vysokija dachody.

Krysten Ściuart zaniała pieršaje miesca ŭ čarhovym rejtynhu samych vysokaapłatnych aktorak, jaki štohod składaje časopis Forbes: za pieryjad z maja 2011 hoda pa maj 2012 jana zarabiła $34,5 młn, krychu apiaredziŭšy Kemieran Dyjas, u jakoj dachody skłali $ 34 młn.

Ściuart išła da hetaha pośpiechu doŭha: jana zdymajecca ŭ kino z kanca minułaha stahodździa, i da 18-hodździa za plačyma aktorki było kala dvaccaci rolaŭ, u tym liku i epizod u karcinie Šona Pena «U dzikich umovach».

Usio źmianiłasia paśla taho, jak jana atrymała zaprašeńnie ŭ film «Źmiarkańnie», jaki kampanija Summit Entertainment zdymała pavodle papularnaha ramana amierykanskaj piśmieńnicy Stefani Majer.

Ekranizacyja akazałasia ŭdałaj: fanaty knih zrabilisia i fanatami karciny, a vykanaŭcy hałoŭnych rolaŭ — Ściuart, Robiert Pacinsan i (u mienšaj stupieni) Tejłar Łotnier — pierajšli ŭ razrad moładzievych kumiraŭ. Z tych časoŭ vyjšła ŭžo čatyry filmy franšyzy, kožny ź jakich išoŭ u prakacie ź niaźmiennym pośpiecham i vyjhravaŭ naminacyju «najlepšy film» na kinapremii telekanała MTV. Raśli i hanarary aktoraŭ: kali za pieršuju častku jany atrymali pa $2 młn, to za dva zaklučnyja filmy kožny ź ich atrymaje pa $12,5 młn i adsotak z kasavych zboraŭ: kinakampanii daviałosia vykanać patrabavańni trojcy i raskašelicca, bo Bełu Svon na pierapravie nie mianiajuć.

Ale adnymi «zmrokavymi» dachodami na viaršyniu rejtynhu Forbes nie zabracca: u letašnim śpisie vydańnia Ściuart padzialiła piataje miesca z Džulijaj Robierts — u ich było pa $20 młn. Ale minuły hod vyvieŭ Ściuart na inšy ŭzrovień: kolkaść «Źmiarkańniaŭ» narešcie pierajšła ŭ jakaść. Aktorka syhrała ŭ filmie «Biełaśniežka i palaŭničy» — zmročnaj traktoŭcy kazki bratoŭ Hrym; jana navat prajšła pa čyrvonaj darožcy na Kanskim kinafiestyvali dziakujučy karcinie Ŭołtara Salesa «Na darozie» — ekranizacyi adnajmiennaha ramana Džeka Kieruaka.

Akramia taho Krysten Ściuart, jakoj ciapier 22 hady, akazałasia samaj maładoj aktorkaj z pradstaŭlenych u rejtynhu za ŭsiu jaho 16-hadovuju historyju.

U Kemieran Dyjas usio akazałasia praściej: zarobki zabiaśpiečyła adna karcina, niedarahaja 20-miljonnaja kamiedyja «Vielmi drennaja nastaŭnica», jakaja zarabiła ŭ prakacie $216 młn, što dazvoliła aktorcy atrymać niadrenny bonus da standartnaha hanararu. Adznačym, što ŭ minułym hodzie dachody Dyjas nie dazvolili joj pretendavać na miesca ŭ top-5.

Zrešty, śpiecyjalisty časopisa Forbes padličvajuć nie tolki hanarary za filmy, u jakich aktorki zdymalisia za spravazdačny pieryjad: u raźlik iduć dachody ad starych karcin ź ich udziełam, rekłamnyja vypłaty i inšyja krynicy pastupleńnia hrošaj na rachunak. U vyniku mohuć zdaracca i kurjozy: naprykład, Sandra Bałak zaniała až treciaje miesca, niahledziačy na toje, što z traŭnia minułaha hoda vyjšła tolki adna stužka ź jaje ŭdziełam — drama «Žudasna hučna i zanadta blizka».

Zatoje aktorcy da hetaha času płaciać za film 2009 hoda «Niabačny bok» i iduć niejkija hrošy za zdymki ŭ fantastyčnym trylery Alfonsa Kuarona «Hravitacyja» — usiaho Bałak zarabiła $25 młn.

Lidary minułaha hoda Andžalina Džali i Sara Džesika Parkier za minuły hod nie zdoleli zachavać svaje dachody na adpaviednym uzroŭni. Džali zajmałasia ŭłasnym režysiorskim debiutam («U krai kryvi i miodu») i asnoŭnyja hrošy atrymlivała ad rekłamnych kantraktaŭ — naprykład, ad kampanii Louis Vuitton; jaje ahulny dachod za hod skłaŭ $20 młn, što dazvoliła joj zaniać čaćviortaje miesca ŭ śpisie. Ale zatoje za toj ža hod jaje tvar źjaviŭsia na vokładkach 78 časopisaŭ.

Zorcy «Seksu ŭ vialikim horadzie» Sary Džesicy Parkier taksama daviałosia zarablać nie ŭ vialikim kino: jana pierazapuściła svajo šou na telebačańni, vypuściła ŭdałyja duchi, i jaje dachody skłali $15 młn, jakich chapiła na toje, kab utrymacca ŭ dziasiatcy najlepšych na siomym miescy.

Nu, a zamykaje piaciorku samych vysokaapłatnych zorak kino Šarliz Teron, jakoj za jaje $18 młn daviałosia syhrać adrazu ŭ troch karcinach: u niaŭdałaj kamiedyi «Biednaja bahataja dziaŭčynka» i bolš kasavych «Biełaśniežcy i palaŭničym» i «Pramietei» Rydli Skota.

Charakterna, što žančynam u kinabiznesie płaciać mienš, čym ich kaleham-mužčynam: 10 samych vysokaapłatnych aktorak zarabili ŭsiaho $200 młn, a voś pieršaja dziasiatka aktoraŭ atrymała za hod $361 młn.

• 0
• 0
• 0
• 0
• 0
• 0
• 0
• 0