Novy ministr zamiežnych spraŭ Biełarusi Uładzimir Makiej — nie taja fihura, jakaja moža ŭnieści razradku ŭ adnosiny z Zachadam. Takuju dumku vykazaŭ palityčny ahladalnik Raman Jakaŭleŭski, kamientujučy BiełaPAN siońniašnija kadravyja rašeńni kiraŭnika dziaržavy.
«Heta vynikaje chacia b z taho, što Makiej u adroźnieńnie ad Martynava ŭvachodzić u śpis nieŭjaznych u krainy Jeŭrasajuza», — nahadaŭ jon.
Jakaŭleŭski taksama zaznačyŭ, što paśla viadomych padziej 19 śniežnia 2010 hoda Siarhiej Martynaŭ zastavaŭsia ledź nie adzinym vysokim dziaržčynoŭnikam, jaki nie padpadaje pad sankcyi ES.«Havaryłasia, što heta było zroblena dla taho, kab zachavać chacia b minimalnyja kantakty ź Minskam», — skazaŭ ekśpiert.
«Pryznačeńnie na rolu ministra zamiežnych spraŭ nieŭjaznoha ŭ ES śviedčyć pra toje, što źmieny ŭ źniešniaj palitycy Biełarusi naŭrad ci adbuducca. Pakul ciažka ŭbačyć u Makiei fihuru, jakaja praviadzie čarhovy raŭnd dyjałohu z Zachadam, chacia napiaredadni prezidenckich vybaraŭ 2010 hoda jany z Martynavym z hetaj rolaj spraŭlalisia vielmi paśpiachova», — zaznačyŭ Jakaŭleŭski.
Jon taksama miarkuje, što pryznačeńnie Makieja kiraŭnikom źniešniepalityčnaha viedamstva naŭrad ci zdolnaje razburyć płany Brusiela ŭ dačynieńni da Minska.«Ja nie dumaju, što Makiej budzie vykonvać funkcyi pieramoŭščyka ŭ hetym płanie lepš za Martynava», — miarkuje ekśpiert.
Jakaŭleŭski źviarnuŭ uvahu na toje, što pryznačeńnie novaha ministra zamiežnych spraŭ adbyłosia paśla niadaŭniaha vizitu ŭ Minsk kiraŭnika rasijskaha MZS Siarhieja Łaŭrova. «Ź inšaha boku, nakolki ja viedaju, Makiej nie byŭ žadanym u Maskvie, dzie jaho ličyli niejkaj prazachodniaj fihuraj u atačeńni Łukašenki», — dadaŭ palitahladalnik.
Palitołah Dzianis Mieljancoŭ, u svaju čarhu, zaznačaje: na pieršy pohlad, pryznačeńnie Makieja — heta ŭmacavańnie pazicyj MZS.
«I MZS u cełym, i sam Makiej ličylisia asnoŭnymi prychilnikami prajeŭrapiejskaha kirunku. Makieja ličać baćkam idei libieralizacyi 2008 hoda», — nahadaŭ ekśpiert.
Razam z tym, padkreśliŭ jon, «varta dačakacca, chto ž budzie pryznačany kiraŭnikom Administracyi prezidenta».«Nie sakret ža, što hienieralnyja rašeńni pa źniešniaj palitycy prymajucca mienavita ŭ Administracyi, a MZS — usiaho tolki vykanaŭca», — patłumačyŭ Mieljancoŭ.
«Na pieršy pohlad, situacyja zaraz takaja, što nibyta pavinien uzmacniacca kurs na paciapleńnie adnosinaŭ z Zachadam. Chacia jość i ślizki momant: Makiej uniesieny ŭ śpis nieŭjaznych Jeŭrasajuza. Ja nie vyklučaju, što jaho vyklučać sa śpisu. Martynaŭ u 2011 hodzie paźbiehnuŭ traplańnia ŭ hety śpis, tamu što jamu była adviedzienaja rola „kantakciora“. I zaraz, mnie zdajecca, dla ES było b łahična vyklučyć sa śpisu Makieja. Dumaju, što jany buduć ruchacca ŭ hetym kirunku», — prahnazuje palitołah. Uładzimir Makiej, ciapier užo były kiraŭnik Administracyi prezidenta, byŭ uklučany ŭ čorny śpis ES rašeńniem Savieta ministraŭ zamiežnych spraŭ Jeŭrasajuza na pasiadžeńni ŭ Brusieli 31 studzienia 2011 hoda. Makieja, jak i mnohich inšych vysokapastaŭlenych biełaruskich čynoŭnikaŭ, ES ličyć adkaznym za parušeńni pravoŭ čałavieka padčas prezidenckaj kampanii 2010 hoda. Uniesienym u śpis asobam zabaroniena naviedvać terytoryju ES, a ich rachunki i majomaść u krainach Jeŭrasajuza padlahajuć zamarožvańniu.
Što ludzi kažuć ab prajeździe praz «Bruzhi» i «Bierastavicu» i čamu ŭ apošniaj stajać pa 12 hadzin6
Što ludzi kažuć ab prajeździe praz «Bruzhi» i «Bierastavicu» i čamu ŭ apošniaj stajać pa 12 hadzin
«Naiŭna spadziavalisia zarablać u Jeŭropach, pryjazdžać dadomu lačyć zuby na chalavu i zdavać kvateru». Prapahanda pačała apraŭdvać darahija žyroŭki dla «darmajedaŭ»1919
Kamientary