«Трансформэры»
Тайны радавод падлеткавага атракцыёну.
Трансформэры (Transformers)
ЗША, 2007, каляровы, 144 хв.
Рэжысэр: Майкл Бэй
Ролі выконваюць: Шыа Лабеф, Мэган Фокс, Джош Дзюамэль, Рэйчэл Тэйлар, Тайрэс Гібсан, Джон Войт, Джон Туртура
Жанр: Маладзёвы фантастычны баявік
Адзнака: 5,5 (з 10)
Цывілізацыі мэханічных істотаў – Аўтаботаў і Дэсэптыконаў – вядуць змаганьне паміж сабой. Згублены Энэргетычны куб вызначыць, хто будзе панаваць у Сусьвеце. Полем бітвы стаецца Зямля, а ключавая фігура ў барацьбе – падлетак, які вельмі любіць машыны…
Карціна Майкла Бэя – відовішчны камэрцыйны атракцыён. Аснова атракцыёну – лялькі-трансформэры. Калі дзеткі, якія гулялі ў робатаў, што пераўтвараюцца ў аўтамабілі й ваяроў, дасягнулі кінаглядзельнага веку – выйшаў фільм. Майкл Бэй (“Перл-Харбар”, “Армагедон”) – выдатна ўпраўляецца зь вялікім бюджэтам. Крутое мачылава мэханічных лялек, грукат, палёты, пераўтварэньні, вялізныя машыны як лепшыя сябры, страляніна, бомбы і выбухі…
Але, акрамя выкарыстаньня брэндавых цацак (і толікі хлапечага гумару) – карціна мае сваю тайну. І гэтая тайна – сваяцтва.
Самую злую машыну знаходзяць у паўночных ільдах, як у забытай карціне бацькі кінаатракцыёнаў Жоржа Мяльеса (у ягонай стужцы стогадовае даўніны аграмадны сьнегавы чалавек нападаў на вандроўнікаў). Але сваяцтва “Трансформэраў” не абмяжоўваецца такімі пашаноўнымі сувязямі. Мяльесаўскі сьнежны чалавек – стрыечны брат Франкенштэйна, які паводле Шэлі, хаваўся ў ільдах.
Яшчэ адна тайна стужкі – падлеткавая любоў. Каго хлопец любіць болей: машыну, альбо дзяўчыну? Падлеткі вагаюцца, але адказ бомба-фільму не пакідае сумневаў: “круты хлопец” мусіць любіць дзяўчыну – на машыне. Кінадзяцінству - ня скончыцца.
Сэансы ў менскіх кінатэатрах на сайце kino.br.by.
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары