У Мінску ў суботу абвянчаліся палітык Павел Севярынец і Вольга Шылак — фоты і відэа
Вянчанне палітыка, экс-палітвязня Паўла Севярынца і Вольгі Шылак праходзіць сёння ў Мінску. Цырымонія пачалася аб 11-й раніцы ў Катэдральным касцёле на плошчы Свабоды.
На святочную імшу прыйшлі 70 чалавек.
Праваслаўны Павел і Вольга — яна з каталіцкай сям'і — пазнаёміліся пяць гадоў таму.
Вольга нарадзілася ў Вільні, але хутка пасля нараджэння яе бацькі пераехалі ў мястэчка Груздава Пастаўскага раёна. Цяпер бацькі жывуць у вёсцы Баравыя Мядзельскага раёна, гэта на заходнім беразе возера Нарач.
Вольга выкладае польскую мову ў прыватнай адукацыйнай фірме.
Павел — начальнік штаба экс-кандыдата Віталя Рымашэўскага — быў затрыманы і змешчаны ў СІЗА КДБ. У маі 2011 г. быў асуджаны і адпраўлены на «хімію» ў в. Куплін Пружанскага раёна.
Вольга перыядычна адведвала будучага мужа.
Роспіс у ЗАГСе адбыўся за два тыдні да царкоўнага шлюбу.
Сведкам з боку Севярынца быў былы палітвязень Зміцер Дашкевіч.
Севярынец і Шылак упершыню пазнаёміліся дзякуючы сябру, Кастусю Шыталю. Тады Севярынец з Шыталем разам здымалі кватэру, і Шыталь запрасіў Вольгу з сяброўкай у госці.
Паэт Міхась Скобла так сфармуляваў у сваім Фэйсбуку пажаданне маладым: «Каб іх ложак часта рыпаў, і да года сынок выпаў!»
А бацька Паўла Кастусь Севярынец, як колішні артылерыст, пажадаў, каб у справе з’яўлення нашчадкаў Павел «паліў, як з гарматы». «Павел нахапаўся грамадскага шчасця па самую макаўку. А цяпер мне хацелася б, каб у яго было шчаслівае сямейнае жыццё. Я яго больш не выхоўваю. Цяпер ужо Павел мяне выхоўвае. Ён і глыбей мяне думае, і шырэй разумее», — так аадказаў бацька на пытанне пра грамадскую дзейнасць сына.
Каментары