Першы ў Магілёве «Дранiк-fest» пройдзе 18 кастрычніка, паведамілі ў Магілёўскім дзяржаўным універсітэце харчавання.
У этнаграфічным комплексе «Зялёны гай» цэлы дзень гасцей мерапрыемства будуць частаваць адной з самых вядомых і любімых страў беларускай кухні — дранікамі. У конкурснай праграме на прыгатаванне самага смачнага і арыгінальнага драніка будуць удзельнічаць каманды профільных ВНУ і каледжаў Магілёўскай вобласці, якія займаюцца падрыхтоўкай спецыялістаў у сферы грамадскага харчавання.
Прафесійнае журы ў складзе спецыялістаў універсітэта харчавання і рэстаратараў будзе ацэньваць арыгінальнасць стравы, спалучальнасць прадуктаў, ступень складанасці і майстэрства, эстэтычнасць, мастацкі густ і творчасць. А гасцям кулінарнага свята будзе прадастаўлена магчымасць самім вызначыць падчас дэгустацыі, каму ж дастанецца прыз гастранамічных глядацкіх пераваг.
Падчас «Дранiк-festа» гасцей таксама чакае шмат музыкі, нацыянальных беларускіх песень, танцаў і, вядома ж, магчымасць пазнаёміцца з беларускімі кулінарнымі традыцыямі. На фестывалі можна будзе ўбачыць працу кухараў-прафесіяналаў, даведацца пра класічныя і незвычайныя рэцэпты прыгатавання любімай стравы.
Арганізатарамі свята выступаюць Цэнтр гарадскіх ініцыятыў і Магілёўскі дзяржаўны універсітэт харчавання пры падтрымцы адміністрацыі Кастрычніцкага раёна Магілёва, студэнцкага этнаграфічнага таварыства, грамадска-культурнай кампаніі «Будзьма беларусамi».
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч18
Каментары