Беларуская кінастудыя здыме поўнаметражны рэмейк «Прыгодаў ката Леапольда»
Праект ствараецца ў фармаце гульнявога кіно: большасць персанажаў выканаюць акцёры, а дзеянне гісторыі будзе перанесена ў сучаснасць.
Беларуская студыя «Кінацэх», якая зняла трылогію «Не адна дома» і камедыю «Дранікі», разам з Welcome Media пачала працу над поўнаметражным фільмам «Леапольд». У аснову карціны лягуць апавяданні Анатоля Рэзнікава — пісьменніка і рэжысёра знакамітага цыкла савецкіх мультфільмаў пра ката Леапольда, піша Blizko.by.
Праект ствараецца ў фармаце гульнявога кіно: большасць персанажаў выканаюць акцёры, а дзеянне гісторыі будзе перанесена ў сучаснасць. Імёны ўдзельнікаў акцёрскага складу пакуль не раскрываюцца.
Паводле слоў стваральнікаў, гледачоў чакае маштабная кінагісторыя з экшэнам, трукамі, гумарам і фірмовым аптымізмам ката Леапольда.
Здымкі пачнуцца восенню 2026 года. Рэжысёрам праекта выступіць Уладзіслаў Богуш, які зняў фільмы «На вёску да дзядулі» і «Мой тата — мядзведзь 2».
— На гісторыях пра ката Леапольда вырасла некалькі пакаленняў гледачоў. Мы хочам захаваць усё, за што яго любяць — дабрыню, мудрасць і знакамітае «Рабяты, давайце жыць дружна!», — і пры гэтым расказаць новую вялікую і відовішчную гісторыю для сучаснай сямейнай аўдыторыі, — адзначыў прадзюсар Андрэй Ліпаў.
— Мы рыхтуем фільм пра сяброўства і ўменне знаходзіць агульную мову нават у самых складаных сітуацыях. Гэтыя каштоўнасці па-за часам і зразумелыя любому пакаленню, што робіць ката Леапольда сапраўды ўніверсальным кінагероем, — лічыць прадзюсар Максім Максімаў.
Каментары