Беларуска распавяла, колькі ёй каштавала вярнуцца ў Беларусь пасля амаль чатырох гадоў жыцця ў Дубаі
У 2022 годзе Ірына Шмат паехала са сваім каханым на адпачынак у Дубай, а ў выніку засталася там на некалькі гадоў.
У Беларусі Ірына працавала фармацэўткай, але часта думала над тым, у якой сферы яшчэ можа развівацца. Жартуе, што калі б ёй раней нехта сказаў, што яна кіне працу, пераедзе ў Дубай і стане «захавальніцай ачага» (а яшчэ пачне вольна размаўляць на англійскай), дык не паверыла б.
У 2022 годзе беларуска разам са сваім каханым паляцела ў Дубай на адпачынак — яны думалі вярнуцца на радзіму праз некалькі тыдняў. Але ў выніку засталіся.
Ірына прызнаецца, што для яе сітуацыя стала шокам. Бо яна мела 500 даляраў у кашальку, а па-англійску магла сказаць хіба што банальнае «Hello, how are you?». Але Дзмітрый — абраннік Ірыны — змог яе супакоіць і запэўніць, што бярэ ўсю адказнасць на сябе.
Першы час самым складаным для беларускі было змірыцца, што звыклая праца засталася ў мінулым, а таксама пачаць камунікаваць з роднымі і блізкімі ў асноўным па відэасувязі.
Ірына закрылася, баялася кудысьці хадзіць, знаёміцца з новымі людзьмі. Роля хатняй гаспадыні давалася ён не вельмі проста. У адным відэа беларуска кажа, што ў яе ёсць «зарплата жонкі» — большую частку гэтых грошай яна адкладала.
Пры гэтым, яна адзначае: незапланаваная эміграцыя зрабіла іх адносіны толькі мацнейшымі — пара стала сапраўднай камандай. І гэта з улікам таго, што да паездкі ў Дубай Ірына і Дзмітрый сустракаліся ўсяго каля шэсць месяцаў і нават не жылі разам.
Складана было і без машыны. Пара набыла аўтамабіль праз восем месяцаў і пачала актыўна вандраваць. Ірына распавядае, што, дзякуючы гэтаму, яны аб'ездзілі розныя атмасферныя гарады і вёсачкі. Менавіта тады беларуска і пачала актыўна весці блог у інстаграме, каб паказваць небанальныя месцы.
Адаптавалася яна ў Дубаі праз паўтара года.
Падчас адной са сваіх паездак на радзіму Ірына правяла цікавы эксперымент і падлічыла, колькі каштуе яе дзень у Беларусі (бо была ўпэўненая, што ў Дубаі жыць нашмат даражэй).
У той мінскі дзень увайшла кава ў «Макдональдсе», купля невялікіх дзявочых прыемнасцяў у «Залатым яблыку» і «Беліце», абед з сяброўкамі, набыццё кашулі айчыннага брэнда, какава ў кафэ ды таксі. Атрымалася каля 120 даляраў у эквіваленце — у Дубаі аналагічны дзень каштаваў бы каля 150 даляраў. То-бок розніца не касмічная.
Праз чатыры гады пара вырашыла вярнуцца на радзіму. Адной з галоўных прычын Ірына называе тое, што хвалявалася за свой медыцынскі дыплом: калі доўга не працаваць па спецыяльнасці, то ён згарае. А да гэтага жанчына не гатова.
Другая прычына — не хапала фінансаў на тое, каб у Дубаі падтрымліваць звыклы лад жыцця, а зніжаць планку не хацелася. А трэцяя — клімат. Хацелася больш свежага паветра і зеляніны, не думаць пра тое, што кожнае лета неабходна кудысьці эвакуявацца ад спякоты.
Дык колькі ж каштавала вяртанне? Дзяўчына дзеліцца расходамі. Квіткі на самалёт для дваіх — $2500.
Кватэру ў Дубаі пара арандавала зусім пустую — то-бок у свой час ім трэба было набыць усё — ад мэблі і тэхнікі да сталовых прыбораў і дэкору. Перавезці рэчы каштавала б шалёных грошай, таму ўсё распрадавалі. Ірына здзіўляецца, але атрымалася прадаць нават тэкстыль. Але згубілі яны на ўсіх гэтых маніпуляцыях як мінімум $5000.
Прадаваць машыну ў Дубаі было зусім нявыгадна, таму прыйшлося аплачваць дастаўку яе ў Мінск — і вось яшчэ мінус $4000.
На фоне гэтага $100 даляраў, якія аддалі за апошнюю ноч у гатэлі Дубая, падаюцца дробяззю.
У выніку Ірына ацэньвае іх затраты на пераезд у Беларусь у $11‑-12 тысяч. Але нерваў пры арганізацыі ўсяго гэтага спатрэбілася значна больш.
Вяртанне ў Беларусь не было лёгкім — прыйшлося зноў праходзіць праз адаптацыю. Ірына піша, што, з аднаго боку, быццам бы вярнулася не дамоў, а ў новую краіну. З іншага — было сумна разумець, што за гэты час у Мінску ўсё застыла.
Беларускі сэрвіс пасля дубайскага выклікае шмат пытанняў. Затое атрымліваецца эканоміць: калі ў Дубаі можна было купіць усё і адразу, то ў Беларусі трэба шмат чаго замаўляць праз баераў, а ў Ірыны няма энтузіязму гэтым займацца.
Каментары