Жонка Праляскоўскага ўзначальвае прававы аддзел БелТА — чым жыве сям’я былога галоўнага ідэолага краіны
На судзе над галоўнай рэдактаркай Tut.by Марынай Золатавай у якасці сведкі выступіла Галіна Праляскоўская — жонка галоўнага ідэолага краіны Алега Праляскоўскага. Высветлілася, што жанчына ўзначальвае прававы аддзел у агенцтве БелТА.
У сувязі з гэтым «Наша Ніва» вырашыла ўзгадаць і астатніх членаў сям'і экс-чыноўніка.
У свой час Алег Праляскоўскі ўзначальваў аналітычны аддзел службы бяспекі Лукашэнкі, затым — інфармагенцтва БелТА, а з 2003 па 2007 год заняў пасаду намесніка кіраўніка Адміністрацыі прэзідэнта. Пасля былі крэслы галоўнага ідэолага краіны, дырэктара Інфармацыйна-аналітычнага цэнтра і, нарэшце, пасада міністра інфармацыі. Але ў 2014 годзе Праляскоўскага знялі з пасады, і з таго часу ён фактычна знік з радараў.
Чым сёння займаецца былы чыноўнік, дакладна невядома. Ходзяць чуткі, што Праляскоўскі вярнуўся на радзіму, у расійскі Сергіеў Пасад. Нібыта 55-гадовы экс-міністр цяпер датычны да гандлёвай кампаніі, якая займаецца пастаўкамі фруктаў.
Але жонка і дзве дачкі Праляскоўскага засталіся ў Беларусі.
Старэйшай дачцэ Вользе Праляскоўскай 32 гады.
У 2010 годзе Вольга скончыла факультэт міжкультурных камунікацый Мінскага дзяржаўнага лінгвістычнага універсітэта, пасля Акадэмію кіравання па спецыяльнасці «Палітычныя інстытуты: працэсы і тэхналогіі», дзе вывучала выбарчыя тэхналогіі і імідж палітычнага лідара.
Але дзяўчына больш запомнілася не як Вольга, а як «Юліяна» — пад такім псеўданімам Праляскоўская спрабавала пабудаваць музычную кар’еру, нават удзельнічала ў перадчы «Зорны дыліжанс», своеасаблівым беларускім аналагу «Фабрыкі зорак».
Вольга замужам, мае дваіх сыноў. Яе муж Валеры Жыгуноў працуе дырэктарам кампаніі «МАЗ-Ташкент», афіцыйнага дыстрыб’ютара МАЗ ва Узбекістане.
Раней Вольга Праляскоўская працавала ў Белтэлерадыёкампаніі. Цяпер месцам працы ў яе пазначаны Інфармацыйна-аналітычны цэнтр, той самы, які калісьці ўзначальваў яе бацька.
Малодшая дачка Інга таксама скончыла Мінскі лінгвістычны ўніверсітэт, вучылася завочна.
Ёй 30 гадоў. Цяпер яна калега сваёй маці, працуе ў інфармагенцтве БелТА. Замужам з 2011 года, мае сына.
Цяпер чытаюць
Ціханоўская — Трампу: Лукашэнку трэба пакараць, а не заахвочваць9
Каментары