Петразаводскі гарадскі суд прысудзіў кіраўніка Карэльскага аддзялення «Мемарыяла» Юрыя Дзмітрыева да трох з паловай гадоў калоніі, піша РБК.
«Прысуд я яшчэ не атрымаў на рукі, але папярэдні тэрмін пакарання — 3 гады і 6 месяцаў. Такім чынам, ён павінен выйсці на свабоду прыкладна 10-12 лістапада. Ён пакуль адседзеў 2 гады і 2,5 месяца», - распавёў РБК адвакат Дзмітрыева Віктар Ануфрыеў.
Дзмітрыева абвінавацілі ў сэксуальных дзеяннях гвалтоўнага характару ў адносінах да яго непаўналетняй прыёмнай дачкі, пракуратура прасіла для яго пакарання ў выглядзе 15 гадоў зняволення. Працэс праходзіць у закрытым рэжыме.
Юрый Дзмітрыеў — гісторык-аматар і краязнаўца, у 1990-я гады выявіў некалькі найбуйнейшых пахаванняў ахвяр сталінскіх рэпрэсій: каля урочышча Сандармох (каля 9,5 тыс. растраляных), у Чырвоным Бары (амаль 1200 чалавек) і на Секірнай гары на Вялікім Салавецкім востраве. Пад яго рэдакцыяй выходзілі кнігі памяці ахвяр палітычных рэпрэсій у Карэліі. Карэльскае аддзяленне «Мемарыяла» ён узначаліў у 2014 годзе.
Крымінальны пераслед Дзмітрыева працягваецца з 2016 года. Тады яго абвінавацілі ў вырабе дзіцячай парнаграфіі і распусных дзеяннях у дачыненні да падчарыцы, якой у 2016 годзе было 11 гадоў. Усяго ў справе фігуравала 140 фотаздымкаў, 9 з іх былі прызнаныя парнаграфічнымі. Гісторык патлумачыў іх з'яўленне тым, што вёў дзённік здароўя дзіцяці пасля ўдачарэння, дзіця трапіла да яго ў сям'ю худым і аслабленым. Яго абарона заяўляла, што Дзмітрыеў баяўся пазбаўлення бацькоўскіх правоў і вяртання дачкі ў дзіцячы дом, пасля таго як у 2008 годзе органы апекі прынялі сляды, тыя, што засталіся на целе дзіцяці пасля гарчычнікаў, за сінякі ад збіцця.
У падтрымку Дзмітрыева выказваліся вядомыя інтэлектуалы, у тым ліку Святлана Алексіевіч.
Цяпер чытаюць
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю12
Каментары