Дык усё ж як і дзе затрымалі журналіста «Камсамольскай праўды»? Спрабуем раскруціць блытаны клубок з разнастайных заяў
Звесткі пра абставіны затрымання журналіста «КП» Генадзя Мажэйкі, якія ўсплывалі тут і там, больш заблыталі, чым пралілі святло на абставіны аперацыі па яго арышце. Сабралі ў адзін пост усю храналогію падзей, заяў і галоўныя пытанні да дзеянняў праваахоўных органаў як з беларускага, так і з расійскага боку.
Першая больш-менш падрабязная інфармацыя пра тое, куды знік Генадзь Мажэйка, з’явілася 2-га кастрычніка ад яго маці.
Яна паведаміла, што апошні раз размаўляла з сынам па відэасувязі 30 верасня: сын тады знаходзіўся ў гатэлі ў Маскве.
Факт знаходжання ў Расіі пацвярдзіўся і з іншых крыніц. Маці падкрэсліла, што падчас ператрусу Генадзя не было дома. Справай занялося КДБ.
Тое, што журналіста затрымалі ў Маскве, агучвала не толькі яго маці, але і рэдактар «КП» Уладзімір Сунгоркін, і валанцёры.
Затрыманне журналіста з тэрыторыі Расіі называюць «выкраданнем». Яго гучней за ўсяго асуджаюць менавіта расійскія палітыкі і медыяперсоны: ад дэпутата Дзярждумы да старшыні Саюза журналістаў Расіі Уладзіміра Салаўёва з блогерам Іллём Варламавым і рэдактаркай тэлеканала RT Маргарытай Сіманьян.
Пытанне з «КП» дайшло да прэс-сакратара Пуціна і самога прэзідэнта Расіі. Праўда, у Крамлі адзначылі, што «дэталяў яны не ведаюць».
Дарэчы, адвакатаў да Мажэйкі ў першыя дні не пусцілі, як яны не спрабавалі да яго патрапіць.
Між тым, МУС Беларусіў гэты час нічога не каментуе. За гэты час Беларускі саюз журналістаў заявіў, што ў іх інфармацыя ёсць, але яны не будуць яе публікаваць, бо «інфармацыя можа пагоршыць становішча журналіста».
У панядзелак, 4 кастрычніка міністэрства агучыла сваю пазіцыю. Па словах беларускага боку Мажэйку «ўзялі» ў нацыянальным аэрапорце «Мінск».
Далей беларускае міністэрства ўнутраных спраў растлумачыла, чаму Мажэйка ўсё ж з Расіі вярнуўся назад у Мінск. Сілавікі сцвярджаюць, што журналіст з Масквы хацеў вылецець у трэцюю краіну. Але пры спробе зрабіць гэта даведаўся, што быў прызнаны непажаданым на тэрыторыі гэтай самай Расіі. Таму нікуды вылецець Генадзь і не змог — і вось ён вяртаецца на радзіму.
Дадаткова МУС заяўляе, што ў базу «неўязных» (і, выходзіць, нявыязных з тэрыторыі Расіі ў трэцюю краіну), «непажаданых» грамадзян Мажэйку ўнесла сама Расія.
Здарылася гэта, увага, «раней за кастрычнік 2021 года». Але высвятляецца, што гэта не так. Згодна з дадзенымі Галоўнага ўпраўлення па пытаннях міграцыі МУС Расіі, Генадзь Мажэйка адсутнічае ў спісе непажаданых асоб.
Тое, чаму беларускі журналіст быў вымушаны пакінуць Расію, пры якіх абставінах? Так і застаецца галоўным пытаннем без адказу.
Нагадаем, журналіст «Камсамольскай праўды» Генадзь Мажэйка напісаў артыкул пра Андрэя Зельцэра — занатаваў успаміны яго былой аднакласніцы. У выніку ён стаў адным з падазраваных па двум артыкулам КК: ч. 3 арт. 130 (распальванне расавай, нацыянальнай або рэлігійнай варожасці або розні) і арт. 369 (абраза прадстаўніка ўлады). Сайт беларускай «Камсамолкі» быў заблакіраваны.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем6
Каментары