Пакуль віцебскі актывіст адбываў 20-сутачны арышт, міліцыянты прадалі яго тэлефон
Актывіст Барыс Хамайда быў затрыманы ў Віцебску 15 сакавіка. Учора ён выйшаў на волю пасля 20-сутачнага арышту. Затрымалі яго на месцы, дзе ён звычайна распаўсюджвае беларускую літаратуру, а асудзілі за «несанкцыянаванае пікетаванне», піша »Віцебская вясна».
«Я стаяў на звычайным месцы, пад’ехаў падпалкоўнік міліцэйскі, прозвішча я ў яго не спытаў. Ён пачаў разглядаць, з чым я стаю. Убачыў кніжкі, столік, а ў мяне там ужо некалькі гадоў як была начэпленая жоўта-блакітная стужка. Дагэтуль нікому справы не было, і раптам ён заўважыў. І кажа: «Я вас прашу, здыміце гэтую стужку!» Я адмовіўся, сказаўшы, што ў гэты момант ва Украіне пад абстрэламі гінуць дзеці, жанчыны, ідзе захопніцкая вайна, і таму нічога здымаць не буду».
Барыса затрымалі, калі ён збіраўся ўжо сыходзіць. У РУУСе ў заплечніку актывіста знайшлі БЧБ-стужку, а таксама дзве нашыўкі з украінскай сімволікай. У выніку ў пратаколе па арт. 24.23 КаАП міліцыянты напісалі, што Барыс пікетаваў дзвюма стужкамі: бела-чырвона-белай і блакітна-жоўтай.
На наступны дзень віцебская суддзя Алена Цыганкова арыштавала Барыса на 20 сутак.
Падчас арышту Барыс сядзеў з беларусамі, якія выказаліся супраць вайны ва Украіне:
«Па маіх падліках, у ізалятары ў адзін час са мной за «палітыку» сядзелі яшчэ 9 чалавек. Прозвішчы я называць не буду, згадаю хіба некалькі прыкладаў.
Сядзелі там двое жыхароў Мінска, якія прыехалі ў Полацк, каб паглядзець горад. А тут пачалася вайна, і яны выйшлі да гатэля «Дзвіна» з плакатам «Не — вайне», ім далі па 30 сутак.
Сядзеў разам з расонскім хлопцам, яму, як і мне, прысудзілі 20 сутак — за тое, што напісаў зварот у райвыканкам супраць вайны. Яшчэ быў хлопец з Віцебска, які напісаў антываенны верш і размясціў у сацыяльных сетках. Яму прысудзілі 12, здаецца, сутак. З Наваполацка мужчыну асудзілі на 30 сутак за тое, што падчас рэферэндуму нібыта правёў пікет».
Пасля выхаду з ізалятара актывіста павезлі на прафілактычную гутарку і папярэдзілі, што калі яго затрымаюць у трэці раз па адміністрацыйным артыкуле, то распачнуць крымінальную справу.
Кнопачны тэлефон, які суддзя пастанавіла вярнуць Барысу пасля арышту, міліцыянты прадалі за 15 рублёў яшчэ да яго вызвалення, а гэтыя грошы, па іх словах, пайшлі на аплату мінулых штрафаў.
Таксама Хамайда распавёў, што пакуль ён быў у ізалятары, міліцыянты без дазволу зарэгістравалі яго ў Telegram.
-
У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі
-
З 1 верасня беларусам, што едуць у Латвію, трэба будзе зарэгістравацца на спецыяльным партале і запоўніць анкету
-
Спецслужбы пад выглядам «друку сімволікі і сцягоў» спрабуюць падбіць беларусаў замежжа перадаць свае асабістыя звесткі
У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі8
Каментары