Пракапеня: «Рускія атакавалі нашу біржу, як толькі мы абвесцілі сваё рашэнне»
На мінулым тыдні беларускі мультымільянер Віктар Пракапеня, які жыве ў Лондане, абвясціў пра тое, што яго пляцоўка для гандлю крыптавалютамі Currency.com перастане абслугоўваць расійскіх кліентаў. Ëн не чакаў, што адказ будзе такі хуткі.
Праз некалькі хвілін пасля публікацыі заявы кампаніі з асуджэннем нападу Расіі на Украіну і інфармацыі аб спыненні абслугоўвання расійскіх кліентаў у кол-цэнтр пачаўся шквал тэлефанаванняў ад расейцаў з пагрозамі.
А яшчэ праз некалькі гадзін крыптабіржа папала пад самую моцную DDoS-атаку ў сваёй гісторыі, піша Sunday Times. «Яна была ў дзясяткі разоў мацнейшая, чым тыя, з якімі мы сутыкаліся ў мінулым», — кажа Віктар Пракапеня.
Currency.com першай з крыптабіржаў прыняла рашэнне забараніць доступ кліентам з Расіі.
Пракапеня сцвярджае, што ў яго было 500 000 расійскіх кліентаў.
Пракапеня асуджае рашэнне Binance, Coinbase і некаторых іншых пляцовак захаваць свой расійскі бізнэс. «У фінансавай супольнасці ўсе павінны заняць прынцыповую пазіцыю. Дзеянні Расіі трэба асудзіць самым рашучым чынам», — сказаў Пракапеня брытанскаму выданню.
Пракапеня спрабаваў лабіраваць развіццё ІТ-сектара ў Беларусі, аднак пасля 2020 года і фашызацыі беларускага рэжыму гэты кірунак пайшоў пад адхон.
Каментары