Першыя пералётныя птушкі, якія раней адляцелі ў вырай, ужо вярнуліся ў Белавежскую пушчу. Хутчэй за ўсё, іх збіла з панталыку не па-зімоваму цёплае надвор'е, якое было ў снежні ў паўднёва-заходняй частцы Беларусі. Пра гэта пішуць на сайце Нацыянальнага парку «Белавежская пушча».
30 снежня 2022 года слупок тэрмометра нечакана падняўся да +8, а 31 снежня стала яшчэ цяплей, +11. А ў першы дзень 2023 года і зусім быў пастаўлены рэкорд за ўвесь час метэаназіранняў, +16. Лёд на вадаёмах растаў, і ў Белавежскай пушчы тут жа з'явіліся лебедзі-шыпуны, лебедзі-клікуны і прадстаўнікі качыных.
Вялікую чараду качак — да некалькіх сотняў птушак — заўважылі таксама на рацэ Лясная ў раёне вёскі Голы Барок. Сярод іх былі і самыя малыя прадстаўнікі качыных Беларусі — чыркі-свістункі.
Але да качак зімой жыхары буйных гарадоў ужо прызвычаіліся. А вось што больш дзіўна — бачылі на вадаёмах таксама шэрых чапляў, а ў пойме ракі Лясная каля вёскі Навіцкавічы заўважаныя тры вялікія белыя чаплі.
Таксама прыляцелі з цёплай зімоўкі першыя шэрыя гусі і шэрыя журавы. Цэлую чараду з 32 шэрых гусей заўважылі 3 студзеня. Акрамя гэтага, над ракой Лясной кружылася чарада з 30 гусей-гуменнікаў і 9 шэрых жураўлёў.
Заўважым, што апошнім часам з-за пацяплення клімату птушкі перасталі адлятаць у вырай на вялікія адлегласці. Так, многія шэрыя жураўлі і шэрыя гусі стараюцца перачакаць маразы ў Польшчы. Таму для іх не праблема праляцець сотні кіламетраў, калі надвор'е пачынае мяняцца ў той ці іншы бок. Ледзь робіцца трохі цяплей, як іх вабіць на радзіму.
Чытайце таксама:
На мінскай запраўцы жыве варона, якая есць з рук ВІДЭА
«Здаецца, гэта замаскіраваныя яноты». У вёсцы на Гомельшчыне жывуць буслы, якія не змаглі паляцець на поўдзень
Чаму ў птушак не мерзнуць лапкі?
Лебедзі не адляцелі ў вырай? Гэта нармальна
«Далі 3600 рублёў штрафу». На беларуску напісаў палітычны данос хлопец, з якім яна хадзіла на спатканні і якога злавіла на здрадзе31
Каментары