Прапагандыст Шпакоўскі напісаў праграмны пост: У найбліжэйшыя гады завяршыцца эпоха Лукашэнкі
Прапагандыст Аляксандр Шпакоўскі ў фэйсбуку падзяліўся сваімі разважаннямі на фоне навін пра нездароўе Лукашэнкі. Ён заклікае лукашэнкаўцаў захаваць «пераемнасць улады і курсу». І мець запас прадуктаў харчавання, медыкаменты на выпадак ваенных дзеянняў.
«Зразумела, што ў найбліжэйшыя гады завяршыцца эпоха Лукашэнкі, які стаў стваральнікам беларускай дзяржавы, адпаведна, патрыётам будзе неабходна забяспечыць пераемнасць ўлады і курсу, не разваліцца на складнікі, перасварыўшыся між сабой.
Пакуль жа ў гэтым лагеры, калі ацэньваць менавіта «грамадзянскую супольнасць», а не дзяржаўны апарат, разброд і хістанне, спрэчкі пра колер стужачак, пошукі схаваных «нацыяналістаў» і нават стварэнне тэлеграм-каналаў з узаемнымі абвінавачаннямі», — піша Шпакоўскі ў пасце за 14 мая.
Праўладны аналітык наракае, што і вайна ідзе не так, як хацелася б.
«Відавочна, што вайна ва Украіне складваецца для нашых расійскіх саюзнікаў не самым удалым чынам. Можна колькі заўгодна называць вайну «спецаперацыяй», а чэрствы хлеб халвой, але сітуацыя ад гэтага не зменіцца».
А пасля піша, можна сказаць, крамольныя з пункту гледжання дзяржаўнай улады рэчы пра слабасць беларускага войска.
«Суверэнітэт і тэрытарыяльная цэласнасць Рэспублікі Беларусь, безумоўна, гарантуюцца айчыннай арміяй і праваахоўным блокам. Разам з тым усе разумеюць нераўназначнасць сіл Беларусі з аднаго боку і НАТА з іншага. Па факце бяспека нашай краіны забяспечваецца яшчэ і функцыянальнасцю расійскай дзяржавы, Узброеных сіл РФ, здольнасцю Масквы выканаць свае саюзныя абавязкі.
У святле вышэйвыкладзеных абставін нельга выключаць (я бы нават сказаў, што хутчэй «так», чым «не»), што ўкраінскі канфлікт у перспектыве будзе перанесены на тэрыторыю Беларусі».
Прапагандыст дадае, што «патрыётам» трэба выстройваць свае асабістыя планы з улікам пагрозы вайны і каб супрацьстаяць «змагарам». «Напрыклад, мець запас прадуктаў харчавання, медыкаменты», — удакладняе ён.
«Патрэбна пастаянная палітычная і баявая падрыхтоўка, дзе кожны можа выбраць сваю ролю ў залежнасці ад здольнасцяў, полу, ўзросту, стану здароўя».
У канцы свайго праграмнага допісу Шпакоўскі дадае некалькі слоў пра здароўе Аляксандра Лукашэнкі, які пасля 9 мая не з'яўляўся на публіцы.
«Лукашэнка прастудзіўся на пахаванні тых, хто яго хаваў. Хаця ўсе мы не вечныя. Чалавек смяротны, прычым раптоўна. Але не ў гэты раз».
Ён падкрэслівае, што задача лукашэнкаўцаў у тым, каб і без свайго правадыра «адстаяць краіну».
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»2
Каментары