На гэтае пытанне паспрабавалі знайсці адказ амерыканскія навукоўцы.
Даўно вядуцца спрэчкі паміж аматарамі піва наконт таго, якое піва смачнейшае — з бляшанкі ці з бутэлькі. І дзе яно лепш захоўвае свае ўласцівасці з часам: у бляшанцы ці ў пляшцы.
Піва змяшчае мноства смакавых злучэнняў, якія выпрацоўваюцца дражджамі, хмелем і іншымі інгрэдыентамі. Калі захоўваць піва доўга, адбываюцца хімічныя рэакцыі, у выніку якіх адных кампаненты распадаюцца і ўтвараюцца іншыя, што прыводзіць да старэння ці чарсцвення піва.
Каб дапамагчы піваварам прадоўжыць тэрмін прыдатнасці піва, вучоныя правялі шмат даследаванняў. Але ў сваёй большасці яны засяроджваліся на светлых лагерах і абмежаванай групе хімічных рэчываў. Гэта тлумачыцца тым, што светлы лагер — самае распаўсюджанае піва ў свеце.
Хімікі з Каларадскага ўніверсітэта (ЗША) паспрабавалі знайсці адказ на пытанне, у якой тары піва лепш захоўваецца — у бляшанцы ці шкляной бутэльцы? Для гэтага яны ўзялі такія гатункі, як амбер-эль і індыйскі пэйл-эль, якія былі разлітыя ў бутэлькі і бляшанкі. Вынікамі свайго даследавання вучоныя падзяліліся ў часопісе Амерыканскага хімічнага таварыства.
Пробнае піва было зварана на бровары New Belgium Brewing Company у Форт-Колінзе. Каманда захоўвала бляшанкі і карычневыя бутэлькі з абодвума гатункамі піва на працягу месяца ў халодных умовах (3°C), а затым на працягу пяці месяцаў пры пакаёвай тэмпературы (20°C), каб імітаваць тыповыя ўмовы захоўвання.
Праз кожныя два тыдні навукоўцы адкаркоўвалі піва і праводзілі дэталёвы хімічны, спектраграфічны і храматаграфічны аналізы. Усяго аналізавалася каля сямі дзясяткаў хімічных рэчываў.
Вучоныя высветлілі, што канцэнтрацыя некаторых метабалітаў у амбер-элі значна адрознівалася ў залежнасці ад таго, ці было гэта піва разліта ў бляшанку ці ў бутэльку. Амбер-эль заставаўся больш свежым у бутэльцы.
А вось індыйскі пэйл-эль быў нашмат менш адчувальным да тыпу ўпакоўкі. Даследчыкі мяркуюць, што гэта звязана з больш высокай канцэнтрацыяй поліфенолаў з хмелю. Гэтыя злучэнні не толькі прадухіляюць акісленне, але і звязваюцца з амінакіслотамі, захоўваючы іх у піве, а не дазваляючы ім прыліпаць да ўнутранай сценкі кантэйнера.
Такім чынам, калі поліфенолаў у піве мала (лагер, бітар, стаўт), то ў бляшанках акісленне будзе адбывацца заўважна хутчэй.
Гэта тлумачыцца тым, што бляшанкі больш успрымальныя да паглынання кіслароду падчас разліву піва з-за вялікай плошчы паверхні адтуліны бляшанай банкі да прымацавання накрыўкі і немагчымасці цалкам выдаліць з такой банкі паветра з дапамогай вакууму праз яе канструкцыю.
Пры разліве піва ў шкляныя бутэлькі тэхналогія дазваляе выпампаваць паветра з дапамогай вакууму.
А вось тое, што бутэлькі прапускаюць святло, а бляшанкі — не, на піве амаль ніяк не адбіваецца.
Вучоныя заўважаюць, што тып тары ўплывае на смак піва, які з цягам часу змяняецца. Але ў гэтым пытанні шмат нюансаў.
Чытайце яшчэ:
Беларусь забараніла ўвоз літоўскага і польскага піва
У беларускіх крамах сталі прадаваць расійскае піва ў незвычайнай упакоўцы
Нямецкі бровар стварыў першае ў свеце гатовае парашковае піва
Каментары