У Швецыі прайшоў суд над Грэтай Тунберг. Прысуд быў вельмі цікавы
Кліматычная актывістка Грэта Тунберг паўстала ў панядзелак перад судом па абвінавачванні ў непадпарадкаванні паліцыі падчас пратэсту на поўдні Швецыі ў мінулым месяцы, паведамляе AP.
Тунберг і іншыя актывісты былі затрыманыя пасля таго, як 19 чэрвеня яны спынілі рух на нафтавым тэрмінале ў порце Мальмё.
Паводле заявы прэс-сакратара шведскай пракуратуры Анікі Колін і заявы пракурораў, Тунберг выставілі абвінавачванні праз тое, што яна адмовілася выканаць загад паліцыі пакінуць месца пратэсту падчас акцыі.
Пракурор Шарлота Атасэн паведаміла, што за злачынства непадпарадкавання звычайна караюць штрафамі.
Тунберг прызнала, што ўдзельнічала ў акцыі пратэсту і не выканала загаду паліцыі, але не прызнала сябе вінаватай і заявіла, што дзейнічала з неабходнасці.
«Мае дзеянні апраўданыя. Я лічу, што мы знаходзімся ў надзвычайнай сітуацыі, якая пагражае жыццю, здароўю і маёмасці. Незлічоная колькасць людзей і супольнасцяў знаходзяцца пад пагрозай як у кароткатэрміновай, так і ў доўгатэрміновай перспектыве», — заявіла яна суду.
Зрэшты, суд абвясціў, што яна прысуджаная да штодзённага штрафу за непадпарадкаванне праваахоўным органам. Гаворка ідзе пра 30 штодзённых штрафаў па 50 шведскіх крон (каля 4,50 еўра). Акрамя таго, яна павінна аплаціць 1000 шведскіх крон (каля 87 еўра) у Фонд дапамогі ахвярам злачынстваў.
За межамі суда Грэта Тунберг сустрэлася з прэсай і назвала прысуд абсурдным.
«Абсурдна, што тыя, хто дзейнічае ў адпаведнасці з навукай, павінны плаціць за гэта цану… Пакуль прамысловасць выкапнёвага паліва можа спаліць нашу сучаснасць і будучыню», — заявіла яна.
Грэта адзначыла, што будзе працягваць свае акцыі. Яна таксама заявіла, што не будзе падаваць апеляцыю на прысуд.
Тунберг натхніла глабальны моладзевы рух, які патрабуе ўзмацнення барацьбы са змяненнем клімату, пасля таго, як з 2018 года ладзіла штотыднёвыя акцыі пратэсту пад сценамі шведскага парламента.
Разам з ёй будуць судзіць яшчэ трох чалавек.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім17
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3636
Каментары