Буйнога мядзведзя сустрэлі жыхара катэджнага пасёлка Мар'яліва, які знаходзіцца за 10 кіламетраў ад Мінска. Чытачы выдання Sputnik знялі на відэа сустрэчу са зверам, які спакойна шпацыраваў па вуліцы Цэнтральнай гэтага пасёлка.
Як вынікае з відэа, жыхары пасёлка спрабавалі пагутарыць з мядзведзем, крычалі яму «Міша! Міша!», але ён нават не павярнуўся і павольна пайшоў міма калодзежа па сваіх справах.
Гэтым самым, дарэчы, жыхары катэджнага пасёлка груба парушаюць правілы, якіх трэба трымацца пры сустрэчы з небяспечным дзікім зверам. Яго ні ў якім разе нельга чапаць, паколькі нават цалкам добразычлівыя дзеянні і словы, скіраваныя да сябе, мядзведзь можа ўспрыняць як пагрозу і адпаведна адрэагаваць.
Гэты выпадак — не першы за гэтае лета ў Беларусі, калі мядзведзі прыходзяць да самага жылля чалавека, у тым ліку і ў блізкіх ваколіцах двухмільённай сталіцы.
Па даных НАН Беларусі, цяпер Беларусі жыве каля 600-700 мядзведзяў, з іх каля 450 — у Віцебскай вобласці. Іх колькасць за апошні час павялічылася, і навукоўцы мяркуюць, што гэта адбылося не толькі з-за міграцыйнай плыні з суседняй Расіі.
«У апошнія гады мы бачым, што рост колькасці папуляцыі ідзе не толькі за кошт міграцыі. Нашы беларускія мядзведзі пачалі інтэнсіўна размнажацца. З чым гэта звязана, мы пакуль не ведаем»,
— расказаў Sputnik навуковы супрацоўнік НПЦ па біярэсурсах Нацыянальнай акадэміі навук Беларусі Павел Велігураў. Паводле яго, навукоўцам яшчэ толькі трэба высветліць прычыны павелічэння абарыгеннай папуляцыі беларускіх мядзведзяў.
Навукоўцы пры гэтым выступаюць супраць выключэння мядзведзя з Чырвонай кнігі Беларусі і дазволу палявання на яго, з імі салідарнае і Мінпрыроды. Іх рашучы і перакананы апанент — цяперашні кіраўнік Беларускага таварыства паляўнічых і рыбаловаў, былы міністр унутраных спраў Ігар Шуневіч, якога сярод іншага пужае розум мядзведзя.
«Гэта звер небяспечны, разумны, падступны і чалавека ўспрымае як аб'ект ежы», — перакананы Шуневіч, заклікаючы адносна яго «прыняць разумнае і ўзважанае рашэнне».
Чытайце таксама:
Мядзведзя сустрэлі ў Бараўлянах, за 100 метраў ад жылых дамоў
Як паводзіць сябе пры сустрэчы з дзікімі жывёламі — раяць спецыяліст і бывалы паляўнічы
Мядзведзь, якога раней бачылі пад Мінскам, узяўся граміць пчальнікі
Каментары
быццам не пра ўласна мядзведзей чытаеш, а пра "мядзведзей" - истинно русских