ІІХФ уключыла хакейныя зборныя Беларусі і Расіі ў раскладку Алімпіяды-2026. Пры адной вядомай умове
У выпадку алімпійскага допуску беларусы згуляюць у кваліфікацыі, а расіяне атрымаюць прамую пуцёўку на зімовую Алімпіяду 2026 года.
Міжнародная федэрацыя хакея ўключыла мужчынскія зборныя Беларусі і Расіі ў раскладку Гульняў-2026 у Мілане і Карціна-д'Ампеца, піша «Прессбол».
У выпадку «зялёнага святла» ад МАК зборная Расіі па хакеі атрымае прамы пропуск на Гульні, дзе згуляе ў адной групе з ЗША. Астатнія ўдзельнікі квартэта вызначацца пасля кваліфікацыі.
Як вядома, зборныя Беларусі і Расіі выключылі з сусветных спаборніцтваў пасля поўнамаштабнага ўварвання ва Украіну. Зборныя ўжо прапусцілі два чэмпіянаты свету па хакеі і не згуляюць, хутчэй за ўсё, на чэмпіянаце свету ў маі 2024 года. Хоць канчатковае рашэнне аб далейшым лёсе будзе прынятае ў сакавіку наступнага года.
У групе А на Алімпіядзе-2026 згуляюць Канада, Швецыя, Швейцарыя і Італія. У групе B пакуль толькі тры каманды — Фінляндыя, Германія і Чэхія.
Фінальная кваліфікацыя таксама складаецца з трох квартэтаў — D, E і F. У кожным вядомыя пакуль толькі па тры з чатырох зборных.
У выпадку алімпійскага допуску беларусы будуць у першай групе, дзе знаходзяцца Славакія і Казахстан.
У другую вызначылі Латвію, Францыю і Аўстрыю, у трэцяй вылучылі квоты для Даніі, Нарвегіі і Славеніі.
«Беларуская» група D можа згуляць з 29 жніўня па 1 верасня 2024 года ў Браціславе.
Групы будуць дапоўнены пераможцамі другога раўнда кваліфікацыі, дзе будуць змагацца Венгрыя, Літва, Японія, Вялікабрытанія, Румынія, Кітай, Карэя, Польшча і Украіна.
Хакейная зборная Беларусі апошні раз гуляла на Алімпіядзе ў 2010 годзе ў Ванкуверы.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна30
Каментары