Самае строгае пакаранне ў гісторыі футбола. З клуба еўрапейскай прэм'ер-лігі здымуць 141 бал
Кіраўніцтва валійскага клуба «Пантыпрыд Юнайтэд» дакладна страціць сон пасля вынесенага ў панядзелак рашэння мясцовай федэрацыі футбола. З клуба будзе зняты 141 бал, піша football.by.
Па выніках сезона — 2021/22 «Пантыпрыд Юнайтэд» выйшаў у вышэйшы дывізіён Уэльса (Cymru premier). Аднак ужо ў гэтым сезоне «драконы» могуць вылецець з яго з трэскам.
У панядзелак Футбольная асацыяцыя Уэльса (ФАУ) апублікавала заяву, у якой абвясціла пра завяршэнне расследавання ў дачыненні да каманды. Яно было ініцыяванае з-за шматлікіх скаргаў футбалістаў на парушэнні ўмоў іх кантрактаў.
Незалежная камісія пацвердзіла ўсе 18 абвінавачванняў супраць «Пантыпрыд Юнайтэд», уключаючы нявыплату гульцам грошай і няздольнасць зарэгістраваць іх у сістэме Лігі, што прывяло да таго, што неаўтарызаваныя гульцы выходзілі на поле матч за матчам.
У выніку ФАУ прыняла рашэнне зняць з клуба 141 бал. Праўда, такое пакаранне ўступіць у сілу пры ўмове, калі незарэгістраваны гулец зноў з'явіцца ў камандзе з публікацыі рашэння і да заканчэння сезона 2024/25. А проста цяпер з «Пантыпрыд Юнайтэд» знялі 6 балаў.
Аднак, ва ўладальнікаў і кіраўніцтва клуба, хутчэй за ўсё, не будзе іншага выбару, акрамя як панесці поўнае пакаранне.
Большасць футбалістаў «драконаў» па-ранейшаму не маюць права гуляць з-за сур'ёзных фінансавых праблем клуба.
Цяперашняга «мінуса» ў шэсць балаў усё ж хапіла, каб адкінуць «Пантыпрыд Юнайтэд» на апошні, 12-ы радок турнірнай табліцы Прэм'ер-лігі Уэльса. Да гэтага каманда займала 11 месца.
У рэйтынгу футбольных чэмпіянатаў Еўропы прэм'ер-ліга Уэльса займае 52-і радок з 55 краін. Горшыя справы толькі ў чэмпіянатаў Чарнагорыі, Гібралтара, Сан-Марына.
Каментары