Сям’я тыдзень праходзіла святочны квэст ад Мінгарвыканкама. Падарунак вас здзівіць
Сталічныя чыноўнікі вырашылі пакрэатывіць ды зрабілі святочны квэст «Разам з Мінскам у 2024 год». Удзельнікам прапаноўвалася наведаць 21 лакацыю ў Мінску — гэта былі і гандлёвыя аб'екты, і прадпрыемствы, і забаўляльныя пляцоўкі.
Для таго, каб атрымаць прыз каля Палаца спорту (там быў фініш), трэба было адзначыцца хаця б на дзесяці пунктах. Блогерка пад нікам polinka.drozd разам з сям’ёй тыдзень праходзіла гэты квэст і дзялілася ўражаннямі ў тыктоку. А потым пахвалілася падарункамі, якія атрымала.
Сюрпрыз чакаў дзяўчыну ўжо на першай лакацыі — сям’я паехала ў домік Дзеда Мароза ў парк Горкага. Высветлілася, што проста так зайсці да казачных персанажаў немагчыма — патрэбна атрымаць дазвол у адміністрацыі парку. Там жа ставілі штамп у флаер (пацвярджэнне, што людзі былі на лакацыі). Беларускія чыноўнікі ўмеюць зрабіць квэст у квэсце!
У адміністрацыі дзяўчыне стварылі «святочны настрой» па-беларуску: там ёй прачыталі лекцыю, што трэба было запісацца да Дзеда Мароза (а гэта платная паслуга).
У выніку сям'і ўсё ж дазволілі зрабіць адзін фотаздымак з Дзедам Марозам і Снягуркай.
Другой лакацыяй стаў гандлёвы цэнтр «Сталіца». Таксама сям'я наведала Lidbeer Dvor, Музей гарадскога пасажырскага транспарту, кавярню «Камунаркі», Музей гадзіннікавай справы Беларусі, назіральную пляцоўку Нацыянальнай бібліятэкі, фудмол «Канкорс», гандлёвы цэнтр «Галерэя».
Апошняй, дзясятай лакацыяй стаў святочны кірмаш каля Палаца спорту. Там блогерка атрымала падарункі для ўсіх — ім уручылі падушкі з фразамі Лукашэнкі «Любімую не аддаюць», «Распранайся і працуй».
— Галоўны прыз мы атрымалі — гэта тыдзень яркіх эмоцый усёй сям’ёй, — адзначыла блогерка. — Дзве падушкі паселяцца на канапе, я ўжо замовіла навалочкі для іх. А яшчэ дзве з правакацыйнымі надпісамі «Распранайся і працуй» паселяцца ў нас у спальні.
Цяпер чытаюць
«На 15 хвілін выключылі святло — божа мой, з Украінай параўналі». Лукашэнка патлумачыў, колькі эканоміць на вулічным асвятленні19
Каментары