Расследавальнікі вінавацяць самага багатага кандыдата ў прэзідэнты Літвы ў гандлі з Беларуссю ў абыход санкцый
Кандыдата ў прэзідэнты Літвы Ігнаса Вегеле падазраюць у абыходзе санкцый супраць Беларусі. Кампанія кандыдата Vilpra рэзка нарасціла экспарт кандыцыянераў у Кыргызстан пасля абмежавання гандлю з РБ. Кыргызстан адказвае, што столькі кандыцыянераў яны не атрымлівалі.
Сумеснае расследаванне «Бюро», Laisvės TV, Sienas і паказвае, што ў сямейным бізнэсе кандыдата ў прэзідэнты Ігнаса Вегеле ёсць прыкметы магчымага абыходу санкцый.
Даныя, сабраныя даследчыкамі, паказваюць, што кампанія Vilpra, падкантрольная сямʼі Вегеле, прыкладна за паўгода экспартавала кандыцыянераў амаль на мільён еўра з указаннем у якасці краіны прызначэння Кыргызстан.
Аднак факты выклікаюць сумнеў, ці пайшлі кандыцыянеры менавіта туды. Кыргызстан заявіў, што імпартаваў значна менш. Журналісты мяркуюць, што гэта быў гандаль з Беларуссю, куды неўзабаве пасля нападу Расіі на Украіну ЕС забараніў экспарт кандыцыянераў.
Vilpra катэгарычна адмаўляе сваю датычнасць да магчымага механізму абыходу санкцый. Кандыдат у прэзідэнты адказвае на пытанні абвінавачаннямі ў «замоўным расследаванні».
Да 2022 года Кыргызстан не вылучаўся ў якасці буйнога знешнегандлёвага партнёра Літвы. Аднак па меры таго, як санкцыйныя пакеты Еўрасаюза пачалі дзейнічаць адзін за адным, і Літва, і іншыя краіны пачалі актывізаваць гандаль з гэтай краінай. І неўзабаве высветлілася, што значная частка гэтага гандлю — фальшыўка.
Звесткі, атрыманыя журналістамі, паказваюць, што Vilpra інтэнсіўна гандлявала з Кыргызстанам з верасня 2022 года па сакавік 2023 года. За гэты перыяд, заявіла Літва, краіна экспартавала кандыцыянераў больш чым на 2,3 мільёна еўра. Абʼём экспарту Vilpro склаў каля 40% гэтай сумы.
Кыргызстан паведаміў статыстычнаму агенцтву ААН, што за гэты перыяд імпартаваў з Літвы кандыцыянераў усяго прыкладна на 370 тысяч долараў.
Паводле дэкларацыі аб маёмасці і даходах, якую юрыст Ігнас Вегеле падаў як кандыдат у прэзідэнты, летась ён меў маёмасць на 1,5 мільёна еўра. На рахунку кандыдат меў 256 тысячаў еўра, у 2023 годзе ён зарабіў 170 тысяч еўра. Ён самы багаты з 8 кандыдатаў, якія ўдзельнічаюць у сёлетніх прэзідэнцкіх выбарах, дадае «Свабода».
Падчас нядаўніх тэледэбатаў з іншымі кандыдатамі Вегеле заявіў, што дачыненні Літвы з Расіяй павінны быць «вельмі прагматычныя», а стаўленне да Беларусі пасля 2020 году назваў «памылкай». Паводле яго слоў, Літва згубіла «буферную зону» праз непрадуманыя рашэнні, і цяпер у Літвы «фактычна ёсць мяжа з Расеяй за 40 кіламетраў ад Вільні».
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ5757
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ57
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4949
Каментары