У Офісе Ціханоўскай папярэдзілі беларусаў пра небяспеку наведвання ААЭ
Юрыдычная каманда Офіса Святланы Ціханоўскай звярнула ўвагу, што нядаўна паміж урадамі Беларусі і Аб'яднаных Арабскіх Эміратаў падпісана пагадненне аб супрацоўніцтве ў галіне бяспекі і супрацьдзеяння тэрарызму, тэкст якога з'явіўся на Нацыянальным прававым інтэрнэт-партале. У сувязі з гэтым юрысты выказалі рэкамендацыі тым беларусам, якім небяспечна вяртацца ў Беларусь.
Юрысты звяртаюць увагу, што паводле апошняга дакладу праваабарончай арганізацыі Amnesty International, ААЭ актыўна выкарыстоўваюць у нацыянальнай практыцы затрыманні і арышты нязгодных з уладамі грамадзян. Акрамя таго, гэтая дзяржава працягвае трымаць палітычных зняволеных у турмах на падставе нацыянальнага рэпрэсіўнага закона, які дазваляе бестэрміновае «кансультаванне ў пытаннях барацьбы з экстрэмізмам».
Такім чынам, не выключана, што грамадзяне Рэспублікі Беларусь таксама могуць быць затрыманыя ў ААЭ «для кансультацый» і далей выдадзеныя ў Беларусь.
На гэты момант, праўда, падпісаны дакумент прадугледжвае толькі «абмен вопытам і інфармацыяй» паміж Беларуссю і ААЭ. Аднак не варта забывацца: улады Эміратаў актыўна карыстаюцца практыкай пошуку «ворагаў» за мяжой з наступнай дэпартацыяй на радзіму. Напрыклад, у канцы 2023 года ў ААЭ пачаўся новы масавы судовы працэс над 84 абвінавачанымі ў справах, звязаных з «экстрэмізмам».
Акрамя таго грамадзяне Беларусі маюць права ўязджаць, выязджаць і рухацца транзітам праз тэрыторыю ААЭ, а таксама знаходзіцца на гэтай тэрыторыі без віз на працягу 90 дзён з даты ўезду. Дзеля таго ўлады Аб'яднаных Арабскіх Эміратаў могуць «упусціць» чалавека ў краіну і без ягонай згоды, калі ён знаходзіцца ў транзітнай зоне. Тым больш такія прыклады ўжо былі на практыцы ў недэмакратычных краінах — напрыклад, у Расіі.
Таму юрыдычная каманда Офіса Святланы Ціханоўскай заклікае беларусаў адмовіцца ад паездак у ААЭ па любых прычынах — асабліва калі яны асцерагаюцца палітычна матываванага пераследу на радзіме. Таксама не рэкамендуецца разглядаць аэрапорты гэтай краіны ў якасці транзітнай перасадкі.
Цяпер чытаюць
У Познані гінеколаг выдаліў 24‑гадовай беларусцы матку і яечнікі без яе згоды. Яму пагражае да 20 гадоў турмы21
Каментары
Прасаваць трактары на футбольных гульнях і з дапамогай старога добрага таварыша Наўседы таксама
Да каго адрасавана гэтая заява каманды Офіса Святланы Ціханоўскай?