Што вядома пра хлопца, якога вінавацілі ў забойстве ў Серабранцы і застрэлілі пры затрыманні
Аляксандра Ліпскага не маглі знайсці тры гады.
13 жніўня пры затрыманні застрэлілі 32-гадовага Аляксандра Ліпскага, падазраванага ў забойстве. Хлопца і яго маці шукалі тры гады, але знайшлі толькі цяпер. З дапамогай «Белпола» «Наша Ніва» даведалася пра яго больш.
Аляксандру Ліпскаму было 32 гады. Нарадзіўся ён у горадзе Светлагорску Гомельскай вобласці.
З простай сям'і — маці працавала апаратчыцай цэха хімводапрачысткі на Светлагорскай ТЭЦ. У 2009 годзе сям'я пераехала ў Мінск, і яна ўладкавалася ў «Мінскэнерга». Звольнілася адтуль у 2012, працавала на «Амкадоры», у клінінгавай кампаніі, у пяцізоркавым «Прэзідэнт-гатэлі» на вуліцы Кірава.
Бацька тым часам быў на вахтах у Расіі, у асноўным буравіком на нафтавых станцыях.
Ліпскі вучыўся ў Беларускім нацыянальным тэхнічным універсітэце. У 2015 пайшоў працаваць на прадпрыемства «Дыэкас», якое займаецца тэхнічным абслугоўваннем транспарту для будаўніцтва. Пасля перайшоў у «Беларуснафту». А ў 2018 адкрыў ІП з відам дзейнасці «Паслугі ў галіне сухапутнага транспарту».
Аляксандр Ліпскі прапісаны ў Вязынцы Маладзечанскага раёна. У сувязі з гэтым пра сям'ю пісалі медыя — кааператыў узяў з іх грошы, каб правесці газ, але кінуў.
Хлопец увогуле вёў закрыты лад жыцця. Ён не вёў сацсетак, на яго не былі зарэгістраваныя тэлефонныя нумары, у інтэрнэце амаль няма яго фота.
А яшчэ Ліпскі меў судзімасць. 24 снежня 2018 года ён распыліў у твар нейкаму чалавеку газавы балончык, пасля пабіў іншага мужчыну. За гэта супраць яго пачалі крымінальную справу, а пасля ўзялі пад варту ў жніўні 2019-га. У снежні 2019 яму прысудзілі 4 гады хіміі і 3825 рублёў штрафу.
Аляксандра Ліпскага падазравалі ў забойстве, здзейсненым у лістападзе 2021 года. Тады ён са зброяй увайшоў у кватэру і стрэліў у 33-гадовую жанчыну. Яна памерла. Яе муж скокнуў з акна і застаўся жывы. А Аляксандра і яго маці Раісу аб'явілі ў вышук.
Па звестках «Белпола», менавіта на Ракасоўскага ён здзейсніў папярэдняе злачынства, за якое быў асуджаны — толькі ў доме праз дарогу.
Згодна з паведамленнем МУС, знайшлі Ліпскага з дапамогай расійскіх сілавікоў праз бацьку, які на той момант працаваў у Расіі.
Аляксандра Ліпскага застрэлілі падчас затрымання. Паказалі і схрон, у якім хаваўся хлопец. Што стала з яго маці, не паведамляецца, але, падобна, яны не былі разам.
«Наша Нiва» — бастыён беларушчыны
ПАДТРЫМАЦЬАмерыканцы дабіліся вызвалення Юрыя Зянковіча. Ён быў прысуджаны да 11 гадоў зняволення18
Каментары