Праекціроўшчыкі паказалі, як будзе выглядаць плошча Бангалор у Мінску. Ім сказалі падумаць лепш
Праекціроўшчыкі прадставілі 5 варыянтаў, як звонку будзе выглядаць станцыя метро на плошчы Бангалор у Мінску. Ідэі ацанілі члены архітэктурна-горадабудаўнічай рады, піша «Мінск-Навіны».
Канструктыўнае рашэнне будучага збудавання ўжо вызначана і ўзгоднена з «Дзяржбудэкспертызай», а вось знешні выгляд праектны інстытут вырашыў вынесці на абмеркаванне экспертаў.
Папярэдне галоўны архітэктар праектаў Юрый Мацяш расказаў, што рыхтавалася шмат версій. Аднак на суд рады вынеслі пяць варыянтаў.
Габарыты вентшахты — 32 × 22 × 6 м, яна інтэграваная ў інтэр'ер станцыі «Парк Дружбы народаў», якая ў перспектыве будзе перасадачнай на 4-ю лінію падземкі. Будова крыжападобная па форме, уверсе — два зенітныя ліхтары, якія даюць верхняе святло. Яна немаленькая і стане акцэнтам. Таму важна, як будзе выглядаць на пляцы.
Што прапанавалі спецыялісты
Варыянт 1
Мінімалістычна. Плануецца не хаваць шахту або не дэкараваць яе з гэтай мэтай, а пакінуць бетонныя канструкцыі ў цёмна-шэрым колеры.
Варыянт 2
Адрозніваецца тым, што фасад абліцоўваецца керамагранітам або робіцца так званае спайдэрнае шкленне, што палягчае збудаванне. Спайдэрнае шкленне фасадаў — спосаб мацавання шкляных панэляў да фасада будынка з дапамогай спецыяльных кранштэйнаў, якія называюць спайдэрамі. Яны маюць своеасаблівую форму павука.
Варыянт 3
У такой версіі прапануецца адцягнуць увагу ад канструкцыі. Улічваючы, што побач знаходзіцца парк Дружбы народаў, архітэктары вырашылі развіць тэму і стварыць на плошчы круглыя каралі з флагштокамі, дзе размесцяцца сцягі дружалюбных дзяржаў. У цэнтры — беларускі. Сам масіў венткамеры схаваюць калонападобныя туі.
Варыянт 4
Вакол збудавання — своеасаблівы пояс, які абмяжоўвае доступ да аб'екта і, як шырма, затуляе яго з розных бакоў. На паверхнях, што агароджваюць канструкцыі, можна напісаць слова «сяброўства» на розных мовах. Флагштокі ў гэтай версіі захоўваюцца.
Варыянт 5
Тут з'яўляецца Курган дружбы, схілы якога цалкам схаваюць вентшахту. Таксама на схілах задуманы квадратныя ўстаўкі з жывой расліннасцю (трава, мох). Такі варыянт уладкавання дае магчымасць пад'езда спецтэхнікі для абслугоўвання аб'екта. А аблічча кургана за кошт спалучэння матэрыялаў набудзе візуальную лёгкасць, мяркуюць праекціроўшчыкі.
Што сказалі эксперты
Падчас абмеркавання члены архітэктурна-горадабудаўнічай рады аднадушна прызналі недарэчным рашэнне са сцягамі.
«Незразумелы мемарыял. Навошта ён? Тым больш непадалёк на вул. Арлоўскай знаходзіцца плошча Дзяржаўнага сцяга», — заўважылі выступоўцы.
Нехта з экспертаў звярнуў увагу, што калі спыняцца на варыянце з курганам, то лепш яго выканаць у выглядзе землянога адхону.
А вось версія са шкляным фасадам не самая аптымальная, паколькі ў вячэрні час адлюстраванне святла фар здольнае асляпляць аўтамабілістаў.
Прагучалі і іншыя меркаванні: «Каб абыграць венткамеру, патрэбны цікавыя ландшафтныя прыёмы», «Не трэба нічога хаваць, хай аб'ект застаецца бачным, але вакол яго неабходна зрабіць добрую пейзажную кампазіцыю», «Можна «пайграць» з рэльефам вакол і не абавязкова паўтараць форму круга».
Вынікі падвёў галоўны архітэктар сталіцы Віктар Гуцько, сказаўшы, што прадстаўленым варыянтам неабходна дадатковая прапрацоўка, паколькі на сёння рашэнне не знойдзена.
Амерыканцы дабіліся вызвалення Юрыя Зянковіча. Ён быў прысуджаны да 11 гадоў зняволення18
Каментары