Сказаў «дзякуй» чату джыпіці — і кампанія ўлятае на дзясяткі мільёнаў даляраў
Генеральны дырэктар OpenAI Сэм Альтман паведаміў у Twitter, што ветлівасць карыстальнікаў у камунікацыі з ChatGPT абыходзіцца яго кампаніі ў мільёны даляраў.
Фразы кшталту «калі ласка» і «дзякуй» у канцы запытаў ствараюць дадатковую нагрузку на вылічальныя магутнасці і павялічваюць аперацыйныя выдаткі, піша The Insider.
Так ён адказаў на пытанне карыстальніка, наколькі дорага абыходзіцца расход электраэнергіі з-за ветлівых зваротаў. Адзін з каментатараў пажартаваў: «Гэта ж лёгка вырашаецца з дапамогай кода на баку кліента — проста аўтаматычна адказваць «калі ласка». Іншы дадаў: «Калі б яны сапраўды хацелі эканоміць электраэнергію, перасталі б заканчваць кожны адказ пытаннем».
У апошнія тыдні ChatGPT перажывае рэзкі рост папулярнасці, у тым ліку з-за трэнду на «анімэ ў стылі студыі Ghibli», згенераванае штучным інтэлектам. Сярэдняя колькасць актыўных карыстальнікаў у тыдзень упершыню ў гэтым годзе перавысіла 150 млн.
Паводле справаздачы Goldman Sachs, кожны запыт да ChatGPT-4 спажывае прыблізна 2,9 ват-гадзіны электраэнергіі — амаль у дзесяць разоў больш, чым стандартны пошукавы запыт у Google.
Паколькі OpenAI апрацоўвае больш за мільярд запытаў у дзень, сумарнае спажыванне энергіі складае каля 2,9 млн кілават-гадзін у суткі.
Альтман адзначыў, што, нягледзячы на выдаткі, гэтыя сродкі «добра выдаткаваныя», бо ветлівыя звароты робяць узаемадзеянне з ШІ больш чалавечным.
Пракуратура пра смерць Мелказёрава: журналіст меў хранічную хваробу17
Каментары
І наадварот, калі хаміць і ганяць ШІ (у стылі лукашэнкаўскай вертыкалі), то ён не пакрыўдзіцца і дасі той жа вынік, аднак сам чалавек можа звыкнуцца з роляю такога "кіраўніка".