«Спачатку падумаў, што сабака». У Бягомлі ноччу па дварах бегаў мядзведзь ВІДЭА
Жывёла парвала некалькі агароджаў, а потым уцякла ў бок возера.
У ноч на нядзелю ў Бягомлі людзі заўважылі мядзведзя. Паводле відавочцаў, звер перасек дарогу, прабег праз некалькі двароў і знік у лесе.
Адзін з тых, хто бачыў мядзведзя, Дзмітрый, распавёў падрабязнасці, піша «Анлайнер».
«Мы каталіся і ехалі з боку Докшыц у напрамку Бягомля. Я паварочваю галаву — і разумею: нешта вялікае стаіць. Спачатку падумаў, што сабака. Але потым дайшло: у сабакі не можа быць такіх лап. Праз некалькі хвілін вярнуліся — яго ўжо няма. Потым сустрэлі іншую машыну з мужчынамі. Яны пытаюцца: «Сабаку не гублялі?» Кажу: «Ды гэта быў не сабака, а мядзведзь». Яны: «Так, і мы так падумалі». Кажуць, што мядзведзь пабег у бок возера», — расказаў хлопец.
Па словах Дзмітрыя, жывёлу ён убачыў паўторна ўжо каля гарадской лазні:
«Гэта было мядзведзяня — па памерах, максімум аднагодак. Мы пад’ехалі — ён уцёк. Пабег па вуліцы, устаў на заднія лапы, паглядзеў на нас, парваў плот у адным з двароў і знік. А крыху пазней, калі мы ехалі ўздоўж лесу, ён літаральна ўрэзаўся ў плот каля машыны, развярнуўся і зноў уцёк. Мы потым ездзілі і папярэджвалі людзей, каб былі асцярожней — усё ж такі дзікі звер бегае па пасёлку».
Дзмітрый таксама адзначыў, што мядзведзяня выглядала напалоханым.
«Было страшна. Асабліва калі ён такі малады — а раптам дзесьці побач і маці? І відаць, што напалоханы: бегае хаатычна, можа паводзіць сябе непрадказальна», — сказаў відавочца.
Пакуль невядома, адкуль менавіта з’явіўся мядзведзь. У падобных сітуацыях спецыялісты раяць пазбягаць кантакту з дзікімі жывёламі і паведамляць пра іх з’яўленне ў адпаведныя прыродаахоўныя службы.
Цяпер чытаюць
Мельнікава крала грамадскія грошы па $2500, пераводзячы на ўласны рахунак39
Каментары