Мінгарвыканкам прыняў рашэнне ўвесці ў дачыненні да буйнога будаўнічага прадпрыемства «Мінскпрамбуд» часовае знешняе кіраванне. Іншыя падрабязнасці не раскрываюцца, бо дакумент мае грыф «для службовага карыстання», піша ibmedia.by
Акрамя таго, спынены допуск акцый ААТ «Мінскпрамбуд» да біржавых таргоў на Беларускай валютна-фондавай біржы.
Згодна з Законам «Аб пытаннях перадачы пад часовае знешняе кіраванне, прынятым у пачатку 2023 года, такое рашэнне прымаецца ў дачыненні да камерцыйных арганізацый, калі ёсць рызыка спынення іх дзейнасці ці страты для працоўных калектываў, асабліва калі сярод уласнікаў маюцца замежныя асобы.
«Мінскпрамбуд» — прыватнае прадпрыемства, у складзе акцыянераў 6 юрыдычных і 1030 фізічных асоб, многія з якіх — цяперашнія або былыя работнікі кампаніі. Ёсць і замежныя акцыянеры.
Паводле інфармацыі ibMedia.by, рашэнне аб увядзенні знешняга кіравання прынялі на фоне ўнутранага канфлікту ў кампаніі. На 26 мая 2025 года быў запланаваны пазачарговы агульны сход акцыянераў, дзе планавалася разгледзець пытанне аб датэрміновым спыненні паўнамоцтваў генеральнага дырэктара Алега Дашкевіча. На яго месца прапаноўваўся Андрэй Ласкавец. Аднак сход у выніку не адбыўся.
У склад холдынгу «Мінскпрамбуд» уваходзяць 14 арганізацый: будаўнічыя генпадрадчыкі, вытворцы будаўнічых матэрыялаў, праектныя і жыллёва-камунальныя структуры, а таксама санаторый «Бярэзіна».
Прадпрыемства стваралася для будаўніцтва заводаў-гігантаў (МТЗ, МАЗ, «Гарызонт», «Атлант» і іншыя), але з цягам часу профіль дзейнасці пашырыўся. «Мінскпрамбуд» будаваў такія аб’екты, як аўтавакзал «Цэнтральны», «Мінск-Арэна», Палац Незалежнасці, ГЦ «Сталіца» і іншыя. Да 2021 года фірма здала больш за 5000 кватэр агульнай плошчай 350 тысяч м². Кампанія таксама выконвае будаўнічыя заказы ў Расіі.
У 2024 годзе выручка кампаніі вырасла да 284,5 мільёна рублёў, але чысты прыбытак знізіўся да 3,9 мільёна.
Каментары