Шматдзетная амерыканская сям’я ўцякла ў Расію ад «ЛГБТ-прапаганды». Муж ужо трапіў на вайну

У сям’і Дэрэка і Дыяны Хафман — тры дачкі ва ўзросце 10, 11 і 12 гадоў. Па словах бацькоў, у ЗША іх турбавала распаўсюджанасць ЛГБТ-каштоўнасцяў. Менавіта гэта прымусіла іх у 2022 годзе пераехаць з Арызоны ў больш кансерватыўны Тэхас.

Аднак, як расказваў Хафман у інтэрв’ю RT, нават у Тэхасе яны не адчувалі сябе ў бяспецы. Пераломным момантам стала размова адной з дачок з аднакласніцай, якая прызналася ў нетрадыцыйнай арыентацыі. Гэта прымусіла бацькоў сур’ёзна пераасэнсаваць сваю будучыню ў ЗША.

У 2023 годзе сям’я пачала разглядаць магчымасць пераезду ў Расію. Пасля візіту ў Маскву, які стаў вырашальным, у сакавіку 2025 года Дэрэк разам з жонкай і дзецьмі пераехаў у падмаскоўную Істру, дзе пасяліўся побач з іншымі выхадцамі з ЗША.

Аднак, нягледзячы на загадзя спланаваны пераезд, ніхто з сям’і не здолеў авалодаць рускай мовай нават на базавым узроўні. У выніку дзеці не змаглі пайсці ў школу, а бацькі — знайсці працу.

Праз некалькі месяцаў пасля пераезду 45-гадовы Хафман прыняў рашэнне заключыць гадавы кантракт з Міністэрствам абароны Расіі.

Паводле Дыяны, муж доўга шукаў спосаб трапіць у армію і праходзіў сумоўі ў некалькіх установах.

У сваім відэазвароце Дэрэк расказаў, што галоўнай прычынай падпісання кантракту была магчымасць хуткага атрымання грамадзянства:

«Калі я падпішу кантракт на год і адслужу яго, я і мая сям’я атрымаем расійскае грамадзянства. Звычайна гэта займае ад пяці да шасці гадоў. Гэта доўгі шлях. Калі я падпішу кантракт, мы зможам атрымаць грамадзянства адразу. І гэта вельмі важна. Будуць ільготы. Спадзяюся, дзяўчынкі змогуць хадзіць у школу, і я змагу працаваць. (…)

Акрамя грамадзянства і грошай, для мяне вельмі важная павага, тое, што мы заслужылі сваё месца тут, у Расіі, заслужылі грамадзянства. (…) І ніхто не скажа, што мы тут чужыя».

Павялічыць

У адным з відэа, якое Дыяна апублікавала прыкладна месяц таму на сваім ютуб-канале, жанчына расказвала, што яе муж знаходзіўся ў лагеры для навабранцаў, дзе праходзіў вайсковую падрыхтоўку.

«Ён быў на навучанні пару тыдняў. І мы думалі, паколькі ў яго ёсць сертыфікаты зваршчыка і вялікі досвед у будаўніцтве і зварцы, яго адправяць на работу, дзе ён будзе ў бяспецы, ці, па меншай меры, не будзе ёй падвяргацца. Але, на жаль, мы не ўпэўненыя, што так будзе», — дзяліцца жанчына.

«Ён есць кожны дзень, але няшмат. Па-першае, у яго праблемы са страўнікам, па-другое, ежа сухаватая, і з напояў даступная толькі вада. Усё гэта прыводзіць да таго, што ён амаль не есць і пачынае худнець. Таму ён адначасова і крыху радуецца, і не вельмі. Бо як ні круці, цяжка трымацца, калі нармальна не ясі», — раскавае ДэАна.

Жанчына таксама тлумачыць, што людзі ў каментарах не разумеюць рэальнай сітуацыі: многія мяркуюць, што сям’я атрымала вялікую суму грошай за кантракт. Аднак, па яе словах, гэта не адпавядае рэчаіснасці.

«Насамрэч працоўныя мігранты не атрымліваюць тых грошай, пра якія піша на білбордах і плакатах паўсюль. Яны сапраўды атрымліваюць бонус. Так, атрымліваюць. Але, на жаль, гэта не той бонус, пра які вы думаеце. І на жаль, мы ўсё яшчэ маем запазычанасць за дом», — жаліцца яна на першыя рэаліі службы мужа ў расійскай арміі.

Жанчына падкрэслівае, што вельмі ўдзячная аднаму чалавеку, які зразумеў, што сям’я не атрымала абяцаных выплат, і вырашыў дапамагчы: купіў мужу добрыя боты і шмат вайсковага рыштунку.

«Дзякуючы гэтаму ён будзе больш абаронены, чым калі б карыстаўся тым, што выдаюць у войску. У яго цяпер будзе добры шлем і бронекамізэлька», — радуецца Дыяна.

У відэа, апублікаваным 15 ліпеня, яна коратка паведаміла, што з мужам пакуль усё ў парадку:

«Ён жывы і здаровы і лічыць дні, калі прыедзе ў госці».

Жанчына таксама адзначыла, што ў бліжэйшы час мае сустрэцца з адвакатам, каб пачаць афармленне дакументаў для сябе і дзяцей на часовае пражыванне і атрыманне грамадзянства.

• 1
• 3
• 26
• 69
• 2
• 1
• 6
• 0