Сёння пройдзе лёсаванне чэмпіянату свету па футболе. Упершыню ў ім возьме ўдзел 48 камандаў
Чэмпіянат свету па футболе ў 2026 годзе ўпершыню ў гісторыі пройдзе ў трох краінах: ЗША, Мексіцы і Канадзе.
Цырымонія пройдзе ў Вашынгтоне і пачнецца а 18‑й па Мінску, а само лёсаванне групаў адбудзецца недзе а 20-й.
У чэмпіянаце свету возьме ўдзел 48 зборных, з 1998 года было 32 каманды, а перад гэтым — 24. 48 зборных будуць размеркаваныя на 12 групаў па чатыры каманды ў кожнай.
Бяда ў тым, што вядомыя толькі 42 зборныя, што прабіліся на мундыяль, яшчэ чатыры з Еўропы і чатыры з міжкантынентальных стыкаў вызначацца ў сакавіку.
Перад лёсаваннем зборныя размеркаваныя па чатырох кошыках. У асобнай групе будзе па адной зборнай з кожнага кошыка. Прычым у групе будзе мінімум па адной дружыне з Еўропы, але не больш за дзве зборныя з Еўропы (усяго ў кантынента — 16 квотаў).
Кошык 1: Канада, Мексіка, ЗША, Іспанія, Аргенціна, Францыя, Англія, Бразілія, Партугалія, Нідэрланды, Бельгія, Германія.
Кошык 2: Харватыя, Марока, Калумбія, Уругвай, Швейцарыя, Японія, Сенегал, Іран, Рэспубліка Карэя, Эквадор, Аўстрыя, Аўстралія.
Кошык 3: Нарвегія, Панама, Егіпет, Алжыр, Шатландыя, Парагвай, Туніс, Кот-д’Івуар, Узбекістан, Катар, Саудаўская Аравія, ПАР.
Кошык 4: Іярданія, Каба-Вердэ, Гана, Кюрасаа, Гаіці, Новая Зеландыя, еўрапейскі плэй-оф — шлях A (Італія/Паўночная Ірландыя/Уэльс/Боснія і Герцагавіна), еўрапейскі плэй-оф — шлях B (Украіна/Швецыя/Польшча/Албанія), еўрапейскі плэй-оф — шлях C (Турцыя/Румынія/Славакія/Косава), еўрапейскі плэй-оф — шлях D (Данія/Паўночная Македонія/Чэхія/Ірландыя), міжкантынентальныя стыкавыя матчы — шлях 1 (Новая Каледонія/Ямайка/ДР Конга), міжкантынентальныя стыкавыя матчы — шлях 2 (Балівія/Сурынам/Ірак).
У 1/16 фіналу выйдуць па дзве лепшыя каманды з групы (24 зборныя), а таксама лепшыя восем зборных з 12, што зоймуць трэція месцы ў групах.
Чэмпіянат свету пройдзе ўпершыню ў трох краінах — ЗША, Мексіцы і Канадзе — з 11 чэрвеня па 19 ліпеня 2026 года. Фінал будзе разыграны ў Іст-Рутэрфордзе (Нью-Джэрсі).
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары