З'явілася новае сведчанне пабудовы расіянамі сакрэтнай ядзернай базы ў Асіповічах
Расія ўзмацняе сваю ядзерную інфраструктуру на фоне працяглага канфлікту ва Украіне і росту напружання з Захадам. Паводле спадарожнікавых здымкаў Planet Labs, атрыманых Business Insider, маштабнае будаўніцтва ідзе на пяці сакрэтных ядзерных аб’ектах, адзін з якіх у Беларусі.
Прыблізна за 8 км на ўсход ад Асіповічаў размешчана 1405-я база боепрыпасаў, дзе, згодна з аналізам фота, у 2025 годзе з’явіўся новы, абгароджаны трохслаёвай агароджай участак з высокім узроўнем бяспекі.
У яго паўночна-ўсходнім куце цяпер стаіць сховішча, верагодна прызначанае для тактычных ядзерных зарадаў. Уваход да гэтага ўчастка закрыты ад спадарожнікаў, што сведчыць пра павышаную сакрэтнасць.
Аналітык Ганс Крыстэнсэн з Федэрацыі амерыканскіх навукоўцаў таксама адзначыў будаўніцтва пляцоўкі разгрузкі і новай дарогі, якая можа злучыць базу з чыгункай. Такі транспартны вузел мае ключавое значэнне для перавозкі ядзерных боегаловак, якія Расія, як правіла, транспартуе не паветрам, а чыгуначным шляхам.
У Асіповічах, па даных расследавальнікаў, існуе яшчэ адна база, там размешчаны пускавыя ўстаноўкі «Іскандэр». Яны здольныя запускаць ракеты з ядзернымі зарадамі на адлегласць да 500 км. Паводле Крыстэнсэна, гараж для гэтых установак быў пабудаваны, калі Расія перадала «Іскандэры» Беларусі ў канцы 2022 года.
Да сярэдзіны 2025 года база значна пашырылася: з’явіліся новыя будынкі і сховішчы, а на здымках бачны сляды колаў цяжкіх транспартных сродкаў, што сведчыць пра актыўнае выкарыстанне.
Нягледзячы на інфраструктурную гатоўнасць, эксперты лічаць, што самі ядзерныя зарады пакуль знаходзяцца на тэрыторыі Расіі, напрыклад, у Бранску. Яны могуць быць дастаўлены на беларускую тэрыторыю пры неабходнасці. Паводле ацэнак, галоўнае прызначэнне гэтых збудаванняў — рыхтаваць для РФ магчымасць аператыўнага разгортвання тактычных ядзерных узбраенняў у Беларусі.
Цяпер чытаюць
Фіналістак конкурсу «Міс Беларусь — 2025» вывелі на сцэну ў касцюмах з цытатамі Лукашэнкі28
Каментары