Андрэй Стрыжак, які аказаўся днямі ў эпіцэнтры скандалу з рассылкай дыкпікаў, у сваім тэлеграм-канале шчыра расказаў пра асабістае і адказаў на пытанне наконт жонкі.
«Гэты пост пра мяне, як пра чалавека, бо да нядаўняга часу вы ведалі мяне як функцыю. Тры дні не змянілі свет, але шмат што паказалі мне. Некаторыя рэчы, звязаныя з публічнай рэакцыяй, я ўжо бачыў раней, некаторыя адчуў упершыню. Але ж, самае галоўнае, што новага я маю, — гэта свабоду. Свабоду казаць, кім я насамрэч ёсць.
Каб зразумець, што ў цябе баліць цела, не трэба быць доктарам. Дастаткова прыслухвацца да сябе. І ісці да доктара, калі ты разумееш, што ёсць праблема і нешта баліць. З псіхікай тое ж самае, але прызнаць гэта значна цяжэй.
Я шчыра пагутарыў з людзьмі, што добра ведаюць мяне і магу дакладна сказаць сабе і вам — я маю праблему з сэксуальнай залежнасцю і збіраюся працаваць з ёй са спецыялістамі. Але ж пра ўсё па парадку.
Ад 18.05.2023 года я не з'яўляюся жанатым чалавекам. Мы з жонкай скасавалі асабістыя рамантычныя дачыненні і выконваем толькі супольныя абавязкі выхавання дзіцяці. Гэтая сітуацыя моцна паўплывала на мой стан, паводзіны і далейшае развіццё падзей. 2023 год быў адным з найгоршых у маім жыцці, я меў вялікія праблемы з залежнасцямі — алкагольнай, харчовай і сэксуальнай, — і ўсё скончылася цяжкім пераломам. Пасля пералому я ўзяўся за здароўе — даў рады з алкаголем, скінуў вагу, вярнуў функцыю рукі, але ж зусім не даваў рады з станам псіхікі.
Цяпер я разумею, што гэта першапрычына праблемы, што ўжо трэція суткі абмяркоўваюць усе. Я практык, і маё рашэнне — звярнуцца да спецыялістаў. Калі нехта мае надзейныя кантакты добрых спецоў, што працуюць з такім тыпам залежнасцяў, буду вельмі ўдзячны».
Андрэй Стрыжак акрэсліў наступныя тры пункты
«1) Я прыношу свае шчырыя прабачэнні ўсім, каму я мог прынесці шкоду сваімі дзеяннямі, залішняй увагай, настойлівасцю, прапановай непажаданага кантакта. Гэтым дзеянням няма апраўданняў, і я разумею што крыўду заўсёды вызначае пакрыўджаны. Кожны чалавек мае сваё ўяўленне пра флірт, сэксуальныя паводзіны і г.д., але ж гэта заўсёды асабісты погляд і мадэль паводзінаў. Я лічу, што ў сэксуальных паводзінах людзей дапушчальныя розныя формы і камбінацыі, калі яны са згоды ўсіх хто ўдзельнічае ў працэсе. Але ж пытанне згоды мной не было да канца адрэфлексаванае.
2) Я не ўлічваў моманту, што нехта з маіх адрасатак можа ўспрымаць мяне як чалавека з пазіцыяй улады над імі. Гэта можа прагучаць дзіўна, але ж я кажу пра сваё ўспрыняцце. Тыя, хто ведае мяне асабіста, ведаюць, што я не ўключаю асабістыя ўпадабанні, ці антыпатыі ў працу. Ніхто з тых, хто хейціў мяне, ніяк не былі дыскрымінаваныя ў дапамозе. Таксама важны момант — дапамогу ад BYSOL так ці інакш атрымалі дзясяткі тысяч чалавек. Ва ўмовах эміграцыі любы мой прыватны кантакт з амаль любой жанчынай з Беларусі і нашага поля, гэта патэнцыйны канфлікт інтарэсаў.
3) У мяне былі моманты адпраўкі несанкцыянаванага і непажаданага кантэнту, дзе я не атрымаў выразнай згоды. Але ж я павініўся і атрымаў прабачэнні ў гэтых гісторыях. Астатнія прыватныя перапіскі, што рабіліся мной, вяліся ў рэжыме ўзаемнасці: я пісаў, і мне пісалі, і па тым, што і як пісалі, я лічыў што гэта актыўная згода. Калі мне нехта казаў не, я спыняўся. Бо не — гэта значыць не. Але ж, як бачна па думцы вышэй, так гэта таксама не заўсёды так. Што з гэтым усім рабіць і як будаваць далей сваё асабістае жыццё, каб нікога не пакрыўдзіць і пазбегнуць магчымага канфлікту інтарэсаў, я не ведаю. Магчыма, калі б я лепш разумеў гэты момант з пазіцыяй улады, то паводзіў бы сябе па-іншаму. Магчыма, нехта падкажа».
Што будзе з расследаваннем у фондзе
«Наконт таго што канкрэтна адбывалася ў маім асабістым жыцці я буду размаўляць у межах разбіральніцтва ініцыянаванага BYSOL. Яно будзе усебаковым і аб'ектыўным, бо будзе прыцягнутая незалежная экспертыза. Першага верасня 2025 года камісія апублікуе рашэнне абавязковае да выканання. Яно вырашыць мой асабісты лёс.
Мая задача разабрацца ў тым, што я рабіў і якое пакаранне я мушу панесці. Кожнае пакаранне мусіць быць сувымернае дзеянню. Ёсць законы, мы ў Еўропе, то давайце будзем імі кіравацца. Калі я злачынца — то мушу быць пакараны. Але не знішчаны як чалавек і асоба.
Таму як маеце што сказаць, ці выказаць прэтэнзіі, можаце гэта зрабіць альбо ў BYSOL, альбо ў любое медыя.
Усім, хто падтрымлівае мяне, я вельмі ўдзячны. Тыя, хто піша мне словы падтрымкі, аддзяляюць тое недапушчальнае, што я зрабіў, ад таго добрага, што я зрабіў. І такая падтрымка дапамагае мне разабрацца ў сабе і памятаць, што любы чалавек і я ў тым ліку — гэта сума ўсіх ягоных учынкаў — дрэнных і добрых. І гэта каштоўна, калі столькі людзей хоча, каб мяне фізічна не існавала».
«Я не развітваюся з вамі. Час пакажа шлях», — падсумаваў Андрэй Стрыжак.
Некалькі актывістак абвінавацілі Стрыжака: высылаў ім дыкпікі
«У жыцці кожнага чалавека ёсць учынкі, што не дадаюць яму гонару». Стрыжак пракаментаваў абвінавачанне ў рассыланні дыкпікаў
«Гэтае гаўно трэба спыняць». Курс, Роўда, Лойка ды іншыя беларусы пра дыкпікі Стрыжака
Навошта мужчыны шлюць жанчынам дыкпікі?
Андрэя Стрыжака часова адхілілі ад кіравання «Байсолам»
«У нас татальнае падзенне». Прадстаўніца дырэктарата Bysol пракаментавала скандал са Стрыжаком
Ад 300 000 да 500 000 даляраў. Стала вядома, хто прывёз Джэйсана Дэрула ў Беларусь1
Каментары