«Не адразу мяне прынялі». Крысціна Ціманоўская расказала, з якімі праблемамі сутыкалася ў польскай зборнай
Беларуская бягуха Крысціна Ціманоўская, якая цяпер прадстаўляе Польшчу, расказала «Белсату», што ў пачатку яе кар’еры ў новай зборнай адносіны з партнёркамі былі напружаныя. Спачатку дзяўчаты прынялі яе варожа, бо яна заняла месца ў эстафеце і адразу паказала высокі вынік. На тое, каб наладзіць давер, спатрэбілася амаль два гады.
«Скажу шчыра, што гэта было нялёгка, і першы год у камандзе быў вельмі цяжкі. У тым ліку і псіхалагічна, таму што не адразу мяне прынялі. Калі ўступіла ў зборную і выступіла на першым чэмпіянаце Польшчы, узяла срэбра. І дзяўчынкі вельмі негатыўна да мяне настроіліся, таму што прыйшла беларуска, забрала другое месца і забрала адно месца ў эстафеце, таму што ў эстафеце бягуць чатыры чалавекі. Адпаведна, чацвёрты чалавек, які быў да мяне, выпаў з гэтай эстафеты, я стала на яго месца, і давялося два гады наладжваць сувязь з дзяўчатамі».
Сітуацыя змянілася пасля леташняй Алімпіяды ў Парыжы, дзе спартсменкі больш зблізіліся. Важную ролю адыграла і змена трэнера: папярэдні ствараў напружанне ў камандзе, а новы, наадварот, дапамагае ладзіць сяброўскую атмасферу. Цяпер у зборнай няма ўнутранай варожасці, дзяўчаты падтрымліваюць адна адну нават на індывідуальных дыстанцыях.
Тыдзень таму Ціманоўская стала чэмпіёнкай Польшчы на 100 метраў і плануе ў будучыні заваяваць золата таксама на 200 метраў. На апошнім чэмпіянаце яна не змагла бегчы гэтую дыстанцыю праз хваробу, але ўсё ж паказала найлепшы вынік сезона.
Спартсменка параўнала досвед у Польшчы з тым, што было ў Беларусі: калі яна скардзілася на трэнерскія метады, там яе проста прымушалі маўчаць і трэніравацца. У Польшчы ж да меркавання атлетаў прыслухоўваюцца.
У верасні польская зборная выступіць на чэмпіянаце свету ў Токіа, і Ціманоўская разлічвае, што іх эстафета пакажа яшчэ лепшы вынік, чым два гады таму ў Будапешце, дзе яны занялі пятае месца.
Ціманоўская стала чэмпіёнкай Польшчы
Ціманоўская паскардзілася, што яе былы муж вывез у Грузію сабаку і там пакінуў
Былы муж Ціманоўскай расказаў, што вярнуўся ў Беларусь яшчэ да выбараў і прагаласаваў за Лукашэнку
Крысціна Ціманоўская пракаментавала заяву Следчага камітэта і «перапіску» з Ігарам Турам
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне8
Каментары