Французскія феміністкі абураныя каментарыямі Брыжыт Макрон аб актывістках
Першая лэдзі Францыі трапіла ў скандал.
Французскія знакамітасці і феміністкі выказалі абурэнне з нагоды слоў першай лэдзі Брыжыт Макрон аб пратэстуючых актывістках на шоу коміка, паведамляе Бі-бі-сі.
Актывісткі ў масках з тварам Ары Абітана перапынілі яго стэндап-шоу ў суботу, выкрыкваючы «Абітан — гвалтаўнік». Абітана абвінавацілі ў згвалтаванні ў 2021 годзе, але следчыя пазней закрылі справу, спаслаўшыся на недахоп доказаў.
Спадарыня Макрон сустрэлася з Абітанам перад яго выступам у нядзелю. На відэа ён кажа, што адчувае сябе «спалоханым», на што Макрон адказвае: «Калі будуць нейкія тупыя с*чкі, мы іх выганім», — пасля чаго ўсміхаецца і смяецца.
Прадстаўнікі Макрон заявілі AFP, што яе словы былі накіраваны на крытыку «радыкальных метадаў» пратэсту.
«Брыжыт Макрон не ўхваляе гэтыя радыкальныя метады», — дадаў член яе каманды.
Словы першай лэдзі — «sales connes» (што перакладаецца як «тупыя с*чкі») — былі падхоплены знакамітасцямі і феміністкамі ў інтэрнэце, якія асудзілі яе дзеянні і гвалт у дачыненні да жанчын.
Дэманстрацыю арганізавала Nous Toutes — французская арганізацыя, якая змагаецца супраць гвалту над жанчынамі.
Большасць тых, хто выкарыстоўвае хэштэг #salesconnes у сацсетках, робяць гэта, каб выказаць падтрымку фемінісцкай супольнасці.
Актрыса Жудзіт Гадрэ — якая абвінавачвала рэжысёра ў згвалтаванні, якое ён адмаўляе — таксама далучылася да кампаніі.
«Я таксама тупая с*чка», — напісала яна ў сацсетках, а бельгійская камедыянтка Фларэнс Мендэс заявіла, што ганарыцца быць адной з іх.
Актрыса і спявачка Надзеж Баўсон-Дзьян таксама прыняла гэты тэрмін, напісаўшы ў інстаграме: «Я таксама тупая с*чка летам, зімой, вясной і восенню».
Яна назвала «адважнай» жанчыну, якая абвінаваціла Абітана ў згвалтаванні, і выказала падтрымку групе Nous Toutes, дадаўшы, што арганізацыя стане «мацнейшай, каб разам змагацца супраць сэксуальнага гвалту».
Актрыса Рашыда Бракні таксама падзякавала «с*чкам» і адзначыла Nous Toutes у сваім пасце.
Тым часам стэндап-камедыянтка Марын Леанарды напісала ў інстаграме: «Феміністкі ніколі не бываюць тупымі с*чкамі».
Брыжыт Макрон наведвала шоу Абітана разам з дачкой.
Бліжэйшым часам будуць вызвалены больш за 150 палітзняволеных39
Каментары