У Японіі заплацілі каля 3,2 мільёна даляраў за блакітнага тунца. Гэта рэкорд
На першым аўкцыёне 2026 года, які адбыўся раніцай 5 студзеня на рыбным рынку Таёсу ў токійскім раёне Кота, блакітны тунец быў прададзены за рэкордныя 510,3 мільёна іен — гэта прыкладна 3,2 мільёна даляраў ЗША.
Па звестках уладаў Токіа, гэта самая высокая цана з 1999 года, калі пачалі весці супастаўную статыстыку. Новы паказчык значна пераўзышоў папярэдні рэкорд — 333,6 мільёна іен, усталяваны ў пачатку 2019 года.
Для параўнання: на аўкцыёне мінулага года блакітны тунец вагой 276 кг быў прададзены за 207 мільёнаў іен.
Сёлетняя рыбіна-рэкардсменка — блакітны тунец вагой 243 кг, — быў злоўлены каля ўзбярэжжа горада Ома ў прэфектуры Ааморы на паўночным усходзе Японіі.
Пакупніком стала кампанія Kiyomura, якая кіруе сеткай рэстаранаў Sushizanmai. Старшыня праўлення кампаніі Кіёсі Кімура пасля аўкцыёну адзначыў, што тунец, набыты на пачатку года, у Японіі лічыцца сімвалам удачы, і выказаў надзею, што як мага больш наведвальнікаў змогуць адчуць навагоднюю атмасферу. У кампаніі падкрэслілі, што, нягледзячы на высокі кошт закупкі, рыбу будуць прапаноўваць кліентам па звычайных цэнах.
Зімовы сезон лову тунца лічыцца асабліва складаным, а вынікі пачатковых аўкцыёнаў года моцна залежаць ад якасці рыбы. Акрамя таго, паколькі пасярэднікі часта закупляюць прадукцыю пад канкрэтныя заказы рэстаранаў і крамаў, такія аўкцыёны разглядаюцца як своеасаблівы індыкатар будучых спажывецкіх тэндэнцый у Японіі.
У той жа час прадстаўнік міжнароднай рыбалоўнай групы НДА Pew Charitable Trusts Дэйв Гершман адзначыў, што гэты аўкцыён мае і пазітыўны сэнс: запасы ціхаакіянскага блакітнага тунца паступова аднаўляюцца пасля перыяду, калі яны лічыліся амаль знішчанымі.
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным13
Каментары