Прэзідэнт Хасэ Херы займаў сваю пасаду ў часовай якасці ўсяго чатыры месяцы, піша Бі-бі-сі.
У кастрычніку перуанскі Кангрэс абвясціў імпічмент папярэдняму кіраўніку дзяржавы — Дзіне Балуартэ.
Херы скінулі не шляхам імпічменту, а вотумам недаверу. Дэпутаты Кангрэса сталі патрабаваць яго адстаўкі, калі стала вядома, што ён некалькі разоў сустракаўся з кітайскім бізнэсоўцам з неадназначнай рэпутацыяй, афіцыйна пра гэта не паведамляючы. Прэзідэнт папрасіў прабачэння за тое, што не раскрыў факт гэтых размоў, але адмаўляў, што ўчыніў нешта незаконнае.
Херы быў ужо сёмым прэзідэнтам Перу з 2016 года. У сераду Кангрэс павінен прызначыць новага кіраўніка дзяржавы, але гэты чалавек прабудзе на пасадзе ўсяго некалькі месяцаў — да прэзідэнцкіх выбараў, якія павінны адбыцца ў красавіку.
Перу — краіна-рэкардсмен у Лацінскай Амерыцы па ліку былых кіраўнікоў дзяржавы, якія былі прысуджаныя да турэмнага тэрміну ў XXI стагоддзі.
З 11 прэзідэнтаў, якія кіравалі Перу ў апошнія 25 гадоў, больш за палову зазналі крымінальны пераслед.
Многія справы звязаныя з бразільскай будаўнічай карпарацыяй Odebrecht. З расследавання Міністэрства юстыцыі ЗША аб супрацоўніцтве з некалькімі краінамі Лацінскай Амерыкі стала вядома, што кампанія, верагодна, давала хабары і ўмешвалася ў выбары ў краінах рэгіёну, каб забяспечыць сабе больш выгадныя кантракты.
Каментары