Мігранцкі крызіс, арганізаваны Лукашэнкам, — усё? Вось што паказваюць лічбы
Пачынаючы з 2021 года мігранты актыўна намагаліся нелегальна трапіць з Беларусі ў Еўрасаюз. Рэжым Аляксандра Лукашэнкі спрыяў гэтаму, выкарыстоўваючы мігрантаў для ціску на суседнія краіны Еўрасаюза. А што цяпер?
Апошнімі месяцамі назіраецца пэўнае зацішша на мяжы Беларусі і Еўрасаюза. Выглядае, што рэжым перастаў выкарыстоўваць нелегальных мігрантаў як элемент гібрыдных атак на суседнія краіны Еўропы.
Польшча
Ад пачатку сакавіка было чатыры дні, калі польскія памежнікі фіксавалі спробы нелегальна трапіць у краіну з боку Беларусі — хоць надвор'е, здавалася б, спрыяльнае. Агулам налічылася каля 25 ахвотнікаў.
За люты было ўсяго пяць дзён, калі польскія пагранічнікі фіксавалі мігрантаў на мяжы. Агулам было зафіксавана 49 спроб нелегальна перасекчы мяжу з боку Беларусі.
У той жа час, у лютым 2025‑га лік ішоў на сотні чалавек, спробы нелегальна перасекчы мяжу фіксаваліся амаль кожны дзень.
Літва
Ад пачатку года літоўскія памежнікі зафіксавалі ўсяго 37 спроб нелегальна трапіць з Беларусі ў Літву.
Пра тое, што сітуацыя з нелегальнай міграцыяй з боку Беларусі змянілася, казалі і ў Службе аховы дзяржаўнай мяжы Літоўскай Рэспублікі. У каментары літоўскаму выданню прадстаўнік Службы адной з прычын, чаму так адбываецца, назваў адсутнасць з беларускага боку актыўных дзеянняў па арганізацыі перавозкі мігрантаў і іх перасялення.
Латвія
На латвійскім кірунку таксама назіраецца значнае зніжэнне спроб нелегальна перасекчы мяжу ў параўнанні з аналагічным перыядам мінулага года. Даныя за студзень не бяром, бо гэты месяц сёлета быў анамальна халодным, што магло паўплываць на настроі мігрантаў. Але не такі ўжо халодны люты і пачатак сакавіка даюць магчымасць скласці пэўную карціну.
За люты 2025 года было зафіксавана 75 спроб нелегальна перасекчы латвійскую мяжу з боку Беларусі. Усяго было 12 дзён, калі такія спробы фіксаваліся.
У лютым 2026 года было ўсяго тры такія дні і 20 чалавек.
За першыя восем дзён сакавіка 2025 года нелегальна перасекчы латвійскую мяжу спрабавалі 23 чалавекі, а з пачатку сакавіка 2026 года — толькі 9.
Каментары
Граніца ад НАТА дакладна на замку? )