У новы рэйтынг мільярдэраў Forbes увайшоў саўладальнік расійска-беларускай групы кампаній «Садружнасць» Аляксандр Луцэнка, які мае беларускі пашпарт. Праўда, у спісе ён пазначаны як адзін са 155 расійскіх мільярдэраў, піша выданне «Белорусы и рынок».
Сёлета Луцэнка заняў 2712‑е месца з капіталам каля 1,4 мільярда даляраў. У разлік пры ацэнцы ягонага багацця бралася таксама доля ў бізнэсе ягонай жонкі Наталлі, якая валодае 50% кампаніі. Бізнэсмен валодае заводамі па вытворчасці кармоў, складамі, вагонамі і офісам у Мінску на праспекце Пераможцаў. Свой бізнэс ён пачынаў у Беларусі ў 1990‑я гады.
Аляксандр Луцэнка займае першае месца ў спісе «Топ-100 паспяховых бізнэсменаў Беларусі — 2025».
Акрамя яго, у спісе мільярдэраў ёсць яшчэ некалькі расійскіх бізнэсменаў, паходжаннем звязаных з Беларуссю: Андрэй Мельнічэнка, Дзмітрый Мазепін, Аляксандр Яўневіч, Уладзімір Мельнікаў, а таксама амерыканскі інвестар Ігар Тульчынскі.
Лідарам новага рэйтынгу Forbes стаў уладальнік кампаній Tesla і SpaceX Ілан Маск з капіталам 839 мільярдаў даляраў. У першую пяцёрку таксама ўвайшлі вядомыя прадстаўнікі тэхналагічнага бізнэсу ЗША: Лары Пэйдж і Сяргей Брын (Google), Джэф Безас (Amazon) і Марк Цукерберг (Facebook).
Усяго ў спіс Forbes у 2026 годзе ўключылі рэкордную колькасць — 3428 мільярдэраў, што на 400 чалавек больш, чым годам раней. Іх сумарны капітал ацэньваецца на 20,1 трыльёна даляраў. Найбольш мільярдэраў жыве ў ЗША — 989 чалавек.
Цяпер чытаюць
Лукашэнка: Абмяркоўваем з ЗША вызваленне палітвязняў7
Каментары