У Мінскім заапарку прачнулася пара мядзведзяў і вядуць актыўнае жыццё
У гэтым годзе мядзведзі добра выспаліся.
У Мінскім заапарку прачнулася пара бурых мядзведзяў — Трыстан і Нюра. Пра гэта БелТА паведаміла малодшая навуковая супрацоўніца заапарка Таццяна Солтысава.
Таццяна Солтысава нагадала, што спячка ў мядзведзяў — гэта натуральны і неабходны фізіялагічны працэс, які рэгулюецца ўмовамі надвор’я. Пры першым сур’ёзным пацяпленні мядзведзі Мінскага заапарка прачнуліся, і гэта адбылося прыкладна ў сярэдзіне лютага.
Яна расказала, што ў гэтым годзе мядзведзі добра выспаліся. «Наш дарослы мядзведзь Трыстан лёг у спячку яшчэ да Новага года. Маладая мядзведзіца Нюра, якая звычайна ігнаруе гэты працэс, у гэтым годзе дзякуючы моцным марозам і снегападам усё ж лягла спаць, але толькі ў пачатку студзеня, пасля Новага года», — адзначыла Таццяна Солтысава.
Малодшая навуковая супрацоўніца патлумачыла, што выхад са спячкі для мядзведзяў — паступовы працэс.
«Спачатку мядзведзь становіцца больш актыўным і пачынае варочацца, але не пакідае бярлогу. Калі зноў ударыць холад, ён можа нават зноў легчы спаць. Таму існуе прыкмета: калі мядзведзь пакінуў бярлог, сур’ёзных маразоў ужо не варта чакаць. Так здарылася і ў нашым выпадку: калі нашы супрацоўнікі ўбачылі, што мядзведзі пачалі выходзіць з берлагу, стала зразумела, што сур’ёзных маразоў больш не прадбачыцца», — адзначыла яна.
Таццяна Солтысава дадала, што пасля спячкі мядзведзі значна схуднелі і цяпер ім трэба паступова вяртацца да звычайнага жыцця і рацыёну. Звычайны рацыён мядзведзя складае каля 18 кілаграмаў ежы, але пасля спячкі гэта ўсяго каля кілаграма. У першыя дні ім стараюцца даваць бялковую ежу: шмат арэхаў, варанае мяса і рыбу, а таксама садавіну і гародніну. «Паступова рацыён павялічваецца, і мядзведзі становяцца ўсё больш актыўнымі», — дадала яна.
Солтысава падкрэсліла, што сёння Трыстан і Нюра ўжо вядуць актыўнае жыццё, і наведвальнікі заапарка могуць назіраць за імі ў іх вальерах.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?12
Каментары