Ці могуць адмовіць у польскім грамадзянстве з-за штрафаў за парушэнне ПДР
Журналіст Аляксей Дзікавіцкі ад імя аб'яднання «Беларуская дыяспары ў Польшчы» звярнуўся ў Міністэрства ўнутраных спраў. Адказ польскага ведамства ён апублікаваў у сваім фэйсбуку.
«У студзені мы накіравалі ў міністэрства ліст, у якім выказалі меркаванне, што трактаванне нязначных парушэнняў ПДР як «пагрозы бяспецы грамадства» з’яўляецца празмерным і не павінна пазбаўляць людзей надзеі на атрыманне грамадзянства», — піша Аляксей Дзікавіцкі.
На пачатку сакавіка Таварыства атрымала адказ з міністэрства на васьмі старонках, падпісаны дырэктаркай Дэпартамента грамадзянства і рэпатрыяцыі Монікай Прус, вось што гаворыцца ў адказе:
1. Паняцце «пагроза грамадскаму парадку» — менавіта так ваяводы трактуюць парушэнні правіл дарожнага руху — не з’яўляецца сталым, яно змяняецца з часам. Стаўленне да парушэнняў ПДР як да нязначных ужо ў мінулым. У наш час улады прымаюць розныя меры, у тым ліку заканадаўчыя, каб парушэнні ПДР успрымаліся як рэальная пагроза грамадскаму парадку і бяспецы. Таму прэтэндэнты на грамадзянства павінны ўлічваць гэта і не могуць разлічваць на атрыманне грамадзянства, калі маюць парушэнні ПДР.
2. Міністэрства лічыць, што пры разглядзе пытання, ці з’яўляецца прэтэндэнт на грамадзянства пагрозай грамадскаму парадку, неабходна рабіць так званы «прагноз паводзін заяўніка ў сферы выканання ПДР». Іншымі словамі, ацэньваецца, ці ёсць падставы меркаваць, што іншаземец пасля атрымання грамадзянства будзе парушаць правілы дарожнага руху. Для гэтага ўлічваецца, колькі разоў чалавек парушаў ПДР і ці ёсць тэндэнцыя да сістэматычнага ігнаравання правіл».
«У сувязі з гэтым можна ўмоўна сказаць: калі маеце адно парушэнне ПДР, шанец на атрыманне грамадзянства яшчэ застаецца. Калі парушэнняў больш — то чым іх больш, тым меншыя шанцы на грамадзянства. А калі вы некалькі разоў на працягу аднаго года парушалі ПДР, то шанцы атрымаць грамадзянства сур’ёзна зніжаюцца», — рэзюмуе Аляксей Дзікавіцкі.
Цяпер чытаюць
Марата Маркава перасунулі з пасады міністра інфармацыі ў міністры культуры32
Каментары