Француз наведаў Беларусь — назваў кухню неймавернай і ўразіўся колькасці «патрыятычных» плакатаў
Французскі юнак, якога завуць Бенуа лё Таг, апублікаваў у тыктоку расказ пра падарожжа ў Беларусь. Але змаўчаў пра некаторыя дэталі нашай рэчаіснасці.
Мяркуючы па адным з яго допісаў, Бенуа ўпершыню пажадаў наведаць Беларусь яшчэ ў 2021‑м — маўляў, у Літве быў, то цяпер трэба і ў Беларусь. Але яго першая з дзвюх беларускіх публікацый выйшла толькі ў сакавіку 2026-га.
Днямі ж хлопец вырашыў расказаць падрабязней пра сваё падарожжа. І перш за ўсё ён пажадаў абвергнуць ідэю, што ў Беларусь ехаць не варта, бо небяспечна і глядзець няма чаго. Уражанні Бенуа зусім іншыя:
«Думка пра тое, што ехаць у Беларусь небяспечна — гэта, бадай, самая вялікая хлусня пра гэтую краіну, бо тут надзвычай чыста і бяспечна: я не бачыў на зямлі ні аднаго недакурка, а беларусы вельмі паважлівыя».
Хлопец расказаў і пра тое, як да яго паставіліся на мяжы — выглядае, што ён чакаў іншага:
«Я ўехаў у Беларусь на начным аўтобусе з Вільні (Літва). Я чакаў сур’ёзнага кантролю на мяжы, але супрацоўніца мытні толькі задала мне некалькі простых пытанняў пра маю паездку ў Беларусь і пажадала прыемнага падарожжа».
У каментарах француз удакладніў, што ў яго пыталіся на мяжы. Мытніца ўдакладніла, ці гэта яго першая паездка ў Беларусь, якая мэта паездкі і як зваць яго беларускага сябра. Таксама яна папрасіла паказаць бронь гатэля, зваротны квіток на аўтобус і страхоўку.
У Беларусі Бенуа адзначыў савецкую архітэктуру — яму падалося, гэта вяртанне ў мінулае. А яшчэ добра адазваўся пра беларусаў. Па ўражаннях Бенуа, беларусы вельмі добрыя і гасцінныя, і ім было дзіўна ўбачыць у сябе турыста ажно з Францыі.
Таксама Бенуа пракаціўся ў мінскім метро і наведаў Нясвіж. Ад гастратура па Мінску ён у захапленні:
«Беларуская ежа неймаверная, рэстараны вельмі добрыя, і тут можна знайсці шмат кухняў былых краін СССР. Так што я паеў у беларускім, грузінскім, узбекскім, азербайджанскім і кіргізскім рэстаранах».
Падарожжам хлопец задаволены:
«Вельмі шкада, што столькі людзей абмінаюць гэтую еўрапейскую краіну».
Франкамоўны тыкток Бенуа набраў 77 тысяч праглядаў менш, чым за суткі пасля публікацыі. У каментарах хлопцу іранічна патлумачылі, чаму ж Беларусь, нягледзячы на бязвіз для еўрапейцаў, не топавы кірунак Еўропы:
«Насамрэч, праблема не ў краіне, бо яна выглядае такой жа цікавай для наведвання, як Расія. Праблема ў існуючым палітычным рэжыме».
«Неймаверная краіна і вельмі добры ўрад».
«Супер, а цяпер паспрабуй пакрытыкаваць прэзідэнта — пабачыш, што будзе».
Некаторыя каментатары падтрымліваюць Бенуа ў тым, што не трэба слепа слухаць расказы, якія палохаюць, і што Беларусь насамрэч можа быць бяспечнай — праўда, не ўдакладняюць, што для гэтага трэба быць замежнікам.
Але Бенуа дасталася і адкрытай крытыкі:
«Вельмі лёгка прыязджаць у Беларусь, калі ты палітычна нейтральны і не маеш ніякіх прынцыпаў. Наступны кірунак — Паўночная Карэя і Расія».
«Наша Нiва» — бастыён беларушчыны
ПАДТРЫМАЦЬ«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары