Археолагі вызначылі дакладны ўзрост некропаля, знойдзенага ў Гродне падчас будоўлі
У цэнтры Гродна на вуліцы Малой Траецкай падчас будаўніцтва гандлёва-адміністрацыйнага будынка знайшлі старажытныя парэшткі. Работы на аб'екце прыпыненыя, да даследаванняў прыступілі археолагі. Па ўнікальных знаходках эксперты вызначылі ўзрост некропаля — могілкі датуюцца сярэдзінай XVI стагоддзя, піша sb.by.
Як паведамляе тэлерадыёкампанія «Гродна», вызначальнымі артэфактамі для датавання сталі тры манеты: дзве з іх адчаканеныя ў 1550‑х гадах, адна — у 1620-м.
Рэдкія знаходкі дазволілі археолагам не толькі пацвердзіць свае меркаванні, але і ўдакладніць храналогію: першыя пахаванні з'явіліся пасля 1555 года. Раней лічылі, што могілкі маглі быць больш познімі, але зараз можна з упэўненасцю казаць, што некропаль пачаў функцыянаваць у сярэдзіне XVI стагоддзя.
Дарэчы, дадатковым пацвярджэннем сталі знойдзеныя пярсцёнкі на жаночых пахаваннях — па часе яны цалкам супадаюць з манетным матэрыялам. Паводле слоў археолагаў, могілкі існавалі адносна нядоўга.
Цікава, што таксама знайшлі фрагмент галаўнога ўбору, які захаваўся на пахаванні юнака. Арганіка ў агрэсіўнай зямлі амаль ніколі не захоўваецца, але тканіна прыліпла да металічных дэталяў. Пасля расчысткі і кансервацыі эксперты будуць старацца дакладна вызначыць, што гэта было — шапачка ці абруч для валасоў.
З дзіўных знаходак таксама: шкілет мужчыны, старэйшага за 55 гадоў, з падціснутымі нагамі і без труны. Археолагі выказалі здагадку: паколькі глеба тут цвёрдая і гліністая, магілу маглі выкапаць меншай за рост чалавека. Верагодна, яго пахавалі зімой, калі капаць зямлю асабліва цяжка. У пахаванні не знайшлі ні слядоў труны, ні цвікоў, што бывае вельмі рэдка нават для самых старых пахаванняў.
У цэнтры Гродна выпадкова адшукалі цэлы некропаль. Там мог быць храм, вядомы з XV стагоддзя
На Кальварыі адшукалі магілу аднаго з кіраўнікоў першай беларускай партыі, які нават з ссылкі дасылаў матэрыялы ў «Нашу Ніву»
«Адбярыце ў гэтых неадэкватных пілу!» Як дэпутаты «навялі парадак» на гістарычных могілках у Брэсце
Пяць цікавых могілак Беларусі для наведвання на Дзяды
Герой Беларусі Марына Васілеўская нарадзіла дачку ад касманаўта Алега Навіцкага16
Каментары