Маці дзяўчынкі, якая згубілася ў Гродне, знайшлі. Але яе паводзіны пасля знікнення дачкі здзіўляюць
Як раней паведамлялася, раніцай 25 красавіка трохгадовая дзяўчынка Эмілія з Гродна апынулася адна на вуліцы. Яна ведала сваё імя і імя маці, але не мела ўяўлення, дзе жыве. Таму міліцыя дала аб'яву пра тое, што дзяўчынку знайшлі і шукаюць яе бацькоў. Усё скончылася добра, але да маці ёсць пытанні.
Як высветлілася, у сям’і адбыўся недагляд: сужыцель жанчыны а 6‑й раніцы пайшоў на вучобу і пакінуў уваходныя дзверы кватэры незачыненымі. Гэта дазволіла дзіцяці, пакуль усе іншыя спалі (у сям'і ёсць яшчэ двое дзяцей), выйсці з дому на двор.
Маці заўважыла адсутнасць дачкі толькі каля паловы дзявятай раніцы. Спачатку яна сама шукала дзіця ў двары, але пошукі нічога не далі. Нягледзячы на гэта, у міліцыю жанчына не звярнулася і вярнулася дадому. Чаму яна зрабіла менавіта так, уцямна патлумачыць маці не змагла. Маўляў, думала, што дачка пагуляе і сама прыйдзе назад.
Тым часам дзяўчынку, якая самастойна гуляла па вуліцы, заўважылі мінакі і перадалі супрацоўнікам міліцыі. Там хутка ўстанавілі асобу дзіцяці і знайшлі яе маці праз сваякоў. Калі сілавікі прыехалі ў кватэру з Эміліяй, была ўжо трэцяя гадзіна дня.
Цяпер дзяўчынка знаходзіцца ў бяспецы, яе жыццю і здароўю нічога не пагражала. Аднак у адносінах да маці цяпер будзе праводзіцца праверка, па выніках якой дадуць прававую ацэнку яе дзеянням ці, дакладней, бяздзейнасці.
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай8
Каментары