Эскізны праект вантавага маста прэзентавалі без якога-небудзь тлумачэння, якая патрэба менавіта ў такім інжынерным рашэнні. След выводзіць да амбіцыйных праектаў арабскіх інвестараў.
Падчас святкавання 75‑годдзя Фрунзенскага раёна «БелдарНДІ» прадставіў эскізы вантавага моста як магчымага аб'екта для рэалізацыі ў сталіцы. Гэты раён не мае выхаду да Свіслачы або іншых шырокіх вадаёмаў, якія б патрабавалі ўзвядзення моста падобнага тыпу, проста сам інстытут размешчаны на тэрыторыі раёна.
Інжынерныя збудаванні такога тыпу, дзе дарожнае палатно трымаецца на сталёвых тросах і высокіх пілонах, вызначаюцца надзвычайнай устойлівасцю да вялікіх нагрузак і ветру. Вантавыя масты лепшыя за падвесныя і бэлечныя аналагі пры перакрыцці сярэдніх і вялікіх пралётаў, яны хуткія і эканамічныя ва ўзвядзенні, хоць і больш складаныя ў разліках і праектаванні. Да таго ж, яны часта робяцца архітэктурнымі акцэнтамі ў гарадах.
Раней неабходнасці ў перакрыцці велізарных пралётаў у Мінску наогул не было, бо сталіца не мае ні шырокіх рэк, ні глыбокіх яраў, а пуцеправоды цераз чыгунку можна проста пакласці на неабходную колькасць апор.
Шэсць новых перапраў цераз Свіслач
У генеральным плане Мінска, які праходзіў грамадскае абмеркаванне ў 2025 годзе, закладзена будаўніцтва прынамсі шасці новых мастоў цераз раку Свіслач. Некаторыя з іх выразна акрэслены, пра некаторыя можна меркаваць па ўскосных дэталях генплана.
Чатыры з іх сканцэнтраваныя ў паўднёвай частцы горада. Праекты прадугледжваюць транспартную сувязь паміж Лошыцай і Серабранкай праз злучэнне вуліц Станіслава Манюшкі і Малініна, працяг вуліцы Пляханава да вуліцы Маякоўскага крыху на поўнач ад Лошыцкага парку, а таксама два масты, што злучаць вуліцу Якубава з Дзянісаўскай і тэрыторыяй былой вёскі Сталовай.
Свіслач, адзіная рака ў горадзе, пераправа цераз каторую магла б запатрабаваць значных інжынерных вышукаў, у названых месцах даволі вузкая. Узвядзенне там масіўных пілонаў са складанай сістэмай вантаў нічым не апраўдана.
Яшчэ дзве пераправы запраектаваныя ў паўночнай частцы сталіцы. Адзін мост павінен з'явіцца ў раёне Драздоў, а другі стане працягам вуліцы Ратамскай і звяжа паўднёвы бераг вадасховішча Дразды з паўночным.
Менавіта ў апошнім выпадку шырыня воднага люстэрка такая вялікая, каля 600 метраў, што робіць узвядзенне вантавага моста з трыма вялікімі пралётамі тэхнічна мэтазгодным і візуальна эфектным.
Інфраструктура для «Паўночнага Берага»
Сёння на паўночным беразе вадасховішча Дразды ўрадлівыя сельскагаспадарчыя землі, якія доўга лічыліся недатыкальнымі. Айчынныя забудоўшчыкі маглі толькі аблізвацца на гэты ласы кавалак у межах горада, бо выдзяленне такіх угоддзяў пад жыллё дапускалася толькі пад асабістую адказнасць і выключна для «суперінвестыцыйных праектаў».
Усё змянілася ў канцы 2020 года, калі з'явіўся інвестар з Аб'яднаных Арабскіх Эміратаў. Асабістым указам Лукашэнкі з ландшафтна-рэкрэацыйнай зоны і сельгасугоддзяў было выключана больш за тысячу гектараў, амаль усе з якіх аддалі пад шматкватэрную жылую забудову. Мегапраект атрымаў назву «Паўночны Бераг».
Афіцыйна заяўлялася, што эмірацкая кампанія Emaar Properties на чале з бізнэсменам Мухамедам Алі Алабарам укладзе чатыры мільярды даляраў у стварэнне высокатэхналагічнага «разумнага горада». Праўда, вельмі хутка за гэтым бліскучым фасадам пачалі праглядацца абрысы забудоўшчыка «Эмірэйтс Блю Скай», былой кампаніі «Зомекс Інвестмент», што шчыльна звязаная з добра знаёмай беларусам Dana Holdings.
Калі ж казаць канкрэтна пра тую частку, што ляжыць акурат на поўнач ад вадасховішча Дразды, то там у зону шматкватэрнай забудовы перавялі 316 гектараў былой раллі.
Менавіта гэты новы гіганцкі раён, дзе запланавана ўзвядзенне дзясяткаў тысяч кватэр, і мусіць злучыць вантавы мост з адной з галоўных гарадскіх магістраляў — праспектам Пераможцаў, а далей з буйнымі жылымі масівамі заходняй часткі горада. Пераправа праз вадасховішча ўжо была адлюстраваная на праекце дэталёвай планіроўкі «Паўночнага Берага», зацверджаным яшчэ ўвосень 2022 года.
Праўда, звычайна горадабудаўнічыя планы мала што значаць і пастаянна змяняюцца, але калі за эскізы ўзяўся спецыялізаваны праектны інстытут, сітуацыя выглядае куды больш рэальнай.
Можна меркаваць, што рэалізацыя складанага інжынернага аб'екта з'яўляецца часткай інвестыцыйнай праграмы забудоўшчыка, якому неабходна забяспечыць зручную транспартную даступнасць сваіх новых кварталаў.
З горадабудаўнічага пункту гледжання гэты мост стане ключавым элементам транспартнай артэрыі, якая паўколам ахопіць усю заходнюю частку Мінска. Для рэалізацыі гэтай магістралі сёння ўжо ўзводзіцца пуцеправод над чыгункай, які мае звязаць Ратамскую вуліцу з вуліцай Калеснікава ў Каменнай Горцы.
«Наша Нiва» — бастыён беларушчыны
ПАДТРЫМАЦЬ
Каментары
Яны таксама павінны быць на гэтым мосце, па схемах Генплана Мінска 2025 і ПДП Паўночнага Берага.
Здаецца, ёсць пустая прастора справа ад аўтапаласы, за агароджай і лініяй слупоў-ліхтароў.
Дарэчы, і пра спыненне будаўніцтва метро трэцяй лініі на плошчы Бангалор і пераключэнне на працяг кальцавой лініі было вядома яшчэ летась, у час абмеркавання генплана.
Чаму так даведваемся? Едзе грузавік па маршруце, трасецца, часам з яго выпадаюць угнаенні. Вось метафара інфармавання насялення чыноўнікамі і спецыялістамі.