Залежыць ад таго, ці споўнілася вам 40 гадоў.
Галоўны доктар 10‑й гарадской клінічнай бальніцы Мінска Віктар Ісачкін у інтэрв'ю «Беларусь 1» расказаў, як часта трэба наведваць афтальмолага і колькі чакаюць аперацыі па выдаленні катаракты.
Калі трэба праверыць зрок?
Першы агляд у афтальмолага павінен адбыцца праз месяц пасля нараджэння дзіцяці. Гэта неабходна для таго, каб выключыць прыроджаныя паталогіі — катаракту, глаўкому, захворванні сятчаткі.
Другі раз спецыяліст павінен агледзець дзіця ў год. На гэты раз правяраюць рэфракцыю вока (здольнасць правільна факусаваць святло, каб атрымаўся выразны малюнак), глядзяць, ці ёсць блізарукасць або дальназоркасць.
Трэці раз агляд праводзяць у тры гады — перад тым, як дзіця пойдзе ў садок. Наступны абавязковы візіт — перад школай, у 6 гадоў. Затым агляды павінны праводзіцца штогод, каб не прапусціць развіццё «школьнай» блізарукасці.
Што тычыцца дарослых, то спецыяліст раіць наведваць афтальмолага і вымяраць вочны ціск раз на два гады да 40‑гадовага ўзросту (калі нічога не турбуе), а пасля 40 гадоў — штогод. Калі ж у пацыента блізкія сваякі пакутавалі на глаўкому ці мелі катаракту, то штогадовыя візіты да доктара трэба пачынаць ужо з 35 гадоў.
Якія аперацыі робяць у 10‑й бальніцы?
Віктар Ісачкін кажа, што спецыялісты бальніцы бяруцца лячыць практычна ўсе паталогіі зроку, якія яны могуць дыягнаставаць.
«Вядома, усю паталогію ніхто ў свеце не зможа вылечыць. Часам мы сутыкаемся з выпадкамі, калі чалавеку вельмі цяжка аказаць дапамогу. Часам гэта далёка запушчаныя выпадкі захворвання, калі адбываецца гібель зрокавага нерва, іншыя пытанні», — даводзіць спецыяліст.
Па словах Ісачкіна, самая распаўсюджаная паталогія ў дарослых — гэта катаракта. У тройку лідараў уваходзяць таксама міяпія і глаўкома. Менавіта апошняя найчасцей прыводзіць да слепаты, таму важныя ранні дыягназ і своечасовае лячэнне.
Па словах галоўнага доктара, час чакання планавай аперацыі па выдаленні катаракты ў 10‑й бальніцы сталіцы цяпер два месяцы. Частка гэтага часу сыходзіць на збор аналізаў.
Цяпер чытаюць
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя1
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары