Стаматолаг з Оршы распавяла, што спецслужбы прапанавалі ёй вярнуцца з ЗША ў Беларусь. Яна адказала
У Беларусі ёй абяцалі «годнае жыццё».
Стаматолаг з Оршы Наталля Кукішава, якая з’ехала ў ЗША пасля зняволення ў Беларусі, запісала ролік, у якім распавяла, што ёй напісалі і прапанавалі вярнуцца дадому і «жыць годным жыццём».
«Але я ж ведаю, як у іх выглядае годнасць і чым яна пахне», — кажа Наталля. І расказвае пра гэта годнае жыццё сваю гісторыю.
«Калі нас затрымалі, то першыя два месяцы з нас здзекаваліся як маглі, прыдумлялі ўсялякія забавы. І вось у адзін з дзён нам сказалі, што ў нас не будзе вады. Растлумачылі тым, што ў Жодзіне праводзяцца нейкія там рамонтныя працы, і ў турме вады не будзе», — расказвае яна.
Набраць вады не было куды, і недзе з паловы на сёмую раніцы да васьмі вечара ў камеры не было вады.
«Камера — 14 жанчын, камера маленькая, прыбіральня — гэта дзірка ў падлозе. Ну і ў прыбіральню ж усё роўна ўсе ходзяць, гэта ж натуральная патрэба, і ад гэтага немагчыма нікуды падзецца. Вось уявіце грамадскую прыбіральню на якім-небудзь мерапрыемстве, і вось цэлы дзень туды ходзяць людзі, і вы туды ўвечары вырашылі зайсці. Ну дык вось пахі, напэўна, былі яшчэ круцейшыя, бо там туалет праветрываўся, а ў нас камера была цалкам закрытая і не было вентыляцыі. Мне здаецца, пад вечар у нас ужо вочы пачынала рэзаць», — расказвае яна.
І вось у адзін з дзён у турме ў Жодзіне была вялікая праверка.
«Уявіце, як гэта выглядала з камеры: нам сказалі пашыхтавацца — мы пашыхтаваліся. Адчыняюцца дзверы. Да нас у камеру ўваходзіць мужык — важны такі, пагоны, ордэны, грудзі наперад. І ён робіць крок у камеру… І, карацей, далей як у кіно. Ён выскачыў, я не ведаю як, нібыта яму дваццаць гадоў, і ён спартсмен там нейкага сусветнага ўзроўню па скачках. Таму што адна справа — расказваць людзям пра парадак і пра тое, наколькі яны нікчэмныя, а іншая справа — удыхнуць пах уласнага маральнага выбару», — кажа яна.
І праз пяць хвілін ваду ўжо далі. То-бок вада там была.
«І вось мне зараз кажуць, «прыязджай, будзеш жыць годна». Дык вось мне хацелася б спытаць вось гэтага начальніка, які да нас у той дзень зайшоў: «А вы калі дзверы камеры адчынілі, вы што адчулі? Пах уласнай годнасці ці пах майго прыніжэння?» — звярнулася ўжо з ЗША Наталля да таго начальніка.
Наталлю Кукішаву затрымалі супрацоўнікі КДБ восенню 2021 года па «справе Зельцэра». Але асудзілі на два гады калоніі за каментары пра Лукашэнку.
-
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка
-
Рэйтынг найлепшых гарадоў свету — 2026. На якім месцы Мінск?
-
Беларуска перакладала для прэзідэнта Эквадора, працавала сцюардэсай, а цяпер адкрыла ў Мексіцы сваю моўную школу «Руская з рускай»
Цяпер чытаюць
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка2
Каментары