Кіраўнік МЗС Літвы: Пакуль Беларусь дапамагае Расіі, падставаў для скасавання санкцыяў няма
Пазіцыя Літвы застаецца нязменнаю.
Пакуль Беларусь падтрымлівае расейскую агрэсію супраць Украіны і працягвае гібрыдныя дзеянні супраць суседніх краінаў, падставаў для змены санкцыйнай палітыкі няма. Пра гэта міністр замежных справаў Літвы Кястуціс Будрыс заявіў у інтэрв'ю праекту «Вот Так». Паводле Будрыса, Вільня не бачыць прычынаў змяняць цяперашні падыход да Менску, працягвае каардынаваць дзеянні з саюзнікамі і адначасова рыхтуецца да магчымага ўзмацнення пагрозаў з боку Расеі.
Санкцыі супраць Беларусі змяняць не будуць
Паводле словаў Кястуціса Будрыса, Літва рэгулярна абмяркоўвае са Злучанымі Штатамі як агульную палітыку ў дачыненні Беларусі, так і пытанні вызвалення палітвязняў.
«Мы абмяркоўваем са Злучанымі Штатамі як іх агульную палітыку ў дачыненні Беларусі, так і канкрэтныя намаганні для вызвалення палітычных зняволеных. Літва актыўна ўдзельнічае ў гэтым. Мы надаем лагістычную дапамогу, даем прытулак абаронцам дэмакратычных каштоўнасцяў і правоў чалавека з Беларусі, а таксама прадстаўнікам апазіцыі. Гэтую працу мы працягнем і надалей. Мы таксама кансультуемся наконт санкцыяў Еўрапейскага Звязу, іх перспектываў і прычынаў, праз якія яны былі ўведзеныя», — сказаў Будрыс.
Міністр падкрэсліў, што пазіцыя Літвы застаецца нязменнаю.
«Пакуль Беларусь падтрымлівае расейскую агрэсію супраць Украіны, здзяйсняе гібрыдныя дзеянні супраць суседніх краінаў — Літвы і Польшчы, а цяпер на фоне ўзмацнення нелегальнай міграцыі і супраць Латвіі, — няма ніякіх падставаў сцвярджаць, што прычыны для санкцыяў зніклі», — заявіў ён.
Будрыс адзначыў, што санкцыі ЕС будуць дзеяць як мінімум да пачатку наступнага года.
«Я не бачу ніякіх прыкметаў таго, што цяпер гэтую палітыку трэба мяняць. Мы і надалей будзем прытрымлівацца ранейшага курсу. Мы бачым, што Злучаныя Штаты часам выкарыстоўваюць іншы падыход і задзейнічаюць санкцыі як інструмент для вызвалення палітычных зняволеных. Але Літва мае іншы погляд на сітуацыю, бо шкода ад дзеянняў Беларусі наносіцца беспасярэдне нам», — сказаў міністр.
Паводле словаў кіраўніка літоўскага МЗС, гаворка ідзе не толькі пра міграцыйны крызіс, але і пра іншыя інструменты ціску з боку Менску.
«Гаворка ідзе і пра ўжо згаданую нелегальную міграцыю, і пра выкарыстанне кантрабанды як інструменту ціску, і пра іншыя захады. Гэта пастаянны ціск. Я лічу, што санкцыі працуюць, яны неабходныя, а дзеянні ў гэтай сферы павінны каардынавацца як мінімум на рэгіянальным узроўні», — адзначыў Будрыс.
Расея разлічвае на працяглае супрацьстаянне
Паводле ацэнкі Будрыса, Масква рыхтуецца да доўгатэрміновай канфрантацыі з Захадам і можа паспрабаваць праверыць гатоўнасць NATO.
«Памылкай Расіі можа стаць спроба выпрабаваць адзінства NATO — праверыць нас у тым ці іншым месцы. Мы ўжо цяпер бачым у публічнай прасторы нямала падобных сігналаў, што размовы і дыскусіі пра такія планы ў Расеі сапраўды адбываюцца», — сказаў Будрыс.
Пры гэтым міністр падкрэсліў, што рыхтавацца да такіх сцэнароў неабходна загадзя.
«Не трэба чакаць канкрэтнага папярэджання, каб пачаць рыхтавацца. Трэба проста рабіць сваю справу. Калі нашая гатоўнасць будзе высокай, калі мы загадзя прадумаем рашэнні і будзем дзеяць хутка і ўзгоднена, Расея не зможа скарыстацца ні шэрай зонай, ні затрымкай у прыняцці рашэнняў», — заявіў ён.
Паводле словаў Будрыса, саюзнікам не трэба нанова шукаць вырашэння
«Мне здаецца, нам не варта забывацца, што насамрэч мы ведаем, што трэба рабіць. Цяпер неабходна нарошчваць тэмп рэалізацыі нашых планаў», — сказаў міністр.
Будрыс таксама пракаментаваў расейскія судовыя пазовы супраць краінаў Балтыі. Паводле яго, Вільня загадзя ведала пра рыхтаванне гэтых крокаў і папярэджвала партнёраў з Еўразвязу.
«Мы даведаліся пра гэты намер ужо некаторы час таму. Я асабіста разам з калегамі — міністрамі замежных справаў іншых краінаў Балтыі — інфармаваў міністраў замежных справаў дзяржаваў — чальцоў ЕС пра планы Расіі. Тады гэта быў яшчэ толькі намер, а цяпер ён ужо рэалізаваны: Расея звярнулася ў суд», — распавёў Будрыс.
Ён перакананы, што гаворка ідзе не пра прававую спрэчку, а пра выкарыстанне судовых механізмаў у палітычных мэтах.
«Гэта адзін з інструментаў прапаганды. Гэта ператварэнне права ў зброю, выкарыстанне юрыдычных механізмаў для дасягнення палітычных мэтаў. Такія небяспечныя прэцэдэнты дыскрэдытуюць і самі прававыя механізмы», — заявіў ён.
Са словаў кіраўніка літоўскага МЗС, абвінавачанні Масквы не вытрымліваюць крытыкі.
«Я бачыў гэтыя абвінавачанні. Усе яны высмактаныя з пальца і не маюць нічога агульнага з рэчаіснасцю. Але мы разумеем, што яны важныя для той рэальнасці, якую Расея стварае для ўласнага насельніцтва і спрабуе распаўсюджваць далей, у краінах нашых саюзнікаў і не толькі», — сказаў Будрыс.
Ён дадаў, што Літва даўно сутыкаецца з расійскімі інфармацыйнымі аперацыямі і навучылася ім супрацьстаяць.
«Мы ёсць мішэнню прапагандысцкай і дэзынфармацыйнай вайны. Мы таксама ёсць мэтай так званых аперацыяў FIMI — замежнага інфармацыйнага маніпулявання і ўмяшання. Мы ўжо бачылі мноства прыкладаў таго, як Расія задзейнічае розных удзельнікаў і арганізацыі ў іншых краінах. І мы ўмелі супрацьстаяць такім дзеянням раней і працягваем гэта рабіць цяпер», — адзначыў міністр.
Акрамя таго, кіраўнік літоўскай дыпламатыі лічыць, што адною з галоўных памылак было б спрабаваць адказваць Расіі ў межах навязанага ёю інфармацыйнага парадку дня.
«Але важна не трапіць у раскручаны Расеяй прапагандысцкі млын: калі мы пачынаем апраўдвацца ў межах яе наратыву, мы толькі ўзмацняем яго. Мы ўжо бачылі, як выдуманыя парушэнні правоў чалавека выкарыстоўваліся як нагода для вайны супраць Украіны ў 2014 годзе», — заявіў Будрыс.
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары